Bayern verléiert géint Frankfurt, Mainz séchert sech mat enger 2:1-Victoire géint Gladbach wichteg 3 Punkten an Union Berlin klappt Freiburg.

Am Spëtzematch verléiert Bayern München géint Frankfurt mat 1:2 a léisst nom 3:3 géint Bielefeld weider Punkte leien. Dortmund wënnt kloer mat 4:0 am "Revierderby" géint Schalke, Mainz an de Leandro Barreiro wannen iwwerraschend mat 2:1 géint Gladbach, Union Berlin klappt Freiburg mat 1:0 a Stuttgart wënnt mam nämlechte Resultat zu Köln.

22. Spilldag vun der Futtball-Bundesliga

Schalke 04 - Borussia Dortmund 0:4
0:1 Sancho (42.'), 0:2 Haaland (45.'), 0:3 Guerreiro (60.'), 0:4 Haaland (79.')

Laang hat et Schalke an der éischter Hallschent gutt gemaach an huet net vill Chancen zougelooss. An der 42. Minutt huet sech de Stambouli dunn awer e fatale Feeler geleescht wéi e kuerz virum Strofraum de Ball verluer huet, de Sancho huet de Ball gekroopt an aus 16 Meter an de Gol geschoss. Kuerz virun der Paus huet de BVB nach een drop geluecht wéi den Haaland de Ball wonnerschéi per Säitfallzéier an de lénksen Eck geschoss huet.

No der Paus hat Schalke eng grouss Chance op den 1:2, mee nëmme kuerz drop war et dann awer Dortmund déi op 3:0 erhéicht hunn. An der 60. Minutt huet de Reus de Ball vu lénks flaach an de Strofraum ginn an do konnt de Guerreiro ganz fräi an de Gol schéissen. Den Haaland hat awer nach net genuch a konnt an der 79. Minutt no Virlag vum Bellingham de 4:0 schéissen.

Borussia Mönchengladbach - Mainz 05 1:2
0:1 Onisiwo (10.'), 1:1 Stindl (26.'), 1:2 Stöger (86.')

Schonn no 10 Minutte konnt d'Ekipp vum Leandro Barreiro mat 1:0 géint de Favorit vu Gladbach a Féierung goen. No engem laange Ball vum St. Juste war den Onisiwo fräi duerch a konnt de Sommer iwwerwannen. Gladbach hat dono awer méi vum Match a konnt sech e puer Golchancen erausspillen. An der 26. Minutt ass dann och den Ausgläich gefall. No enger Pass vum Lazaro huet den Hofmann de Ball direkt op de Stindl weider ginn an dee konnt dréchen an de rietsen Eck schéissen. Och no der Paus huet Mainz gekämpft, fir onbedéngt 3 wichteg Punkte mat heem ze huelen. An der 86. Minutt ass de Mainzer dann nach tatsächlech den 2:1 gelongen. De Stöger huet de Ball per Dropkick an aus spatzem Wénkel an de Gol geschoss.

Elo ass Mainz just nach 1 Punkt vun der Relegatiounsplaz fort. De Leandro Barreiro stoung vun Ufank un um Terrain a gouf an der 81. Minutt ausgewiesselt.

Eintracht Frankfurt - Bayern München 2:1
1:0 Kamada (12.'), 2:0 Younes (31.'), 2:1 Lewandowski (53.')

Bayern München hat guer net gutt an de Match fonnt a Frankfurt dogéint huet grouss opgespillt. An der 12. Minutt war et de Kostic, deen de Ball flaach an d'Mëtt ginn huet an de Kamada huet just nach missen de Fouss dohin halen. An der 31. Minutt huet de Younes einfach emol aus der Distanz ofgezunn an de Ball ass am Wénkel ageschloen. Kuerz no der Paus konnt Bayern op 1:2 duerch de Lewandowski verkierzen. Dono huet Bayern gutt gespillt an hat och Chancen, mee Frankfurt konnt den 2:1 bis zum Schluss verdeedegen.

SC Freiburg - Union Berlin 0:1
0:1 Prömel (64.')

1. FC Köln - VFB Stuttgart 0:1
0:1 Kalajdzic (49.')

Klickt hei, fir op d'Säit mat all de Resultater ze kommen.