Den Norweger gewënnt virum Johannes Dale. Bei den Dammen ass et Gold fir d'Lisa Theresa Hauser am Massestart.

De Sturla Holm Laegreid an de Simon Eder hu beim leschte Schéisse jeeweils eng Patroun laanscht geschoss, sou dass déi 2 Éischt virum leschte Schéissen an d'Strofronn missten. De Lukas Hofer an den Arnd Pfeiffer hunn hir Chance awer net genotzt an och si hu missen an d'Strofronn. An esou war et awer den Norweger Sturla Holm Laegreid, deen der Konkurrenz op der leschter Ronn keng Chance gelooss huet an neie Weltmeeschter am Massestart gëtt. Seng 4 Medail bei dëser Weltmeeschterschaft. Iwwer Sëlwer ka sech de Johannes Dale mat engem Retard vun 10 Sekonne freeën. Bronz ass fir de Fransous Quentin Fillon Maillet. Domat sinn d'Weltmeeschterschaften am Biathlon zu Pokljuka nom Massestart bei den Hären eriwwer.

Virun den Häre war et e Sonndeg de Mëtteg schonn un den Dammen. D'Lisa Theresa Hauser huet 4 Mol alle 5 Scheiwen um Schéissstand getraff an huet domat de Grondstee fir hir Victoire geluecht. Vun de ganz séiere Leeferinnen an de grousse Favoritinnen ass keng feelerfräi bliwwen. Ëm d'Podiumsplazen hannert der Éisträicherin hu sech iwwerdeems 3 Norwegerinnen ëm 2 Plaze gestridden. Um Enn konnt d'Ingrid Landmark Tandrevold sech d'Sëlwermedail sécheren, dat virum Tiril Eckhoff an dem Marte Olsbu Roeiseland.