Manchester City verléiert doheem mat 0:2 géint Manchester United. Den Derby Madrileno tëscht Atlético a Real Madrid geet 1:1 aus.

Iwwerdeems verléiert Liverpool fir déi 6. Kéier um Stéck un der Anfield Road a verléiere weider u Buedem. An Italien kann den AC Mailand an den AS Roum gewannen. Och e puer Lëtzebuerger Nationalspiller waren um Sonndeg fir hir Ekippen am Asaz.

Bundesliga

1. FC Köln - Werder Bremen 1:1
0:1 Sargent (66'), 1:1 Hector (83')

Eng éischter langweileg 1. Hallschent hu béid Ekippen hire Supportere virun der Tëlee gebueden, déi mat engem 0:0 zu Enn gaangen ass. Nom Téi ass et dunn am Rhein-Energie-Stadion zu Köln e bësse méi attraktiv ginn. Bremen ass ëmmer besser an de Match komm an ass esou verdéngt an der 66. Minutt duerch de Sargent mat 1:0 a Féierung gaangen. Bremen war nom Gol déi kloer besser Ekipp an hätt mat e bësse méi Reussite och den 2:0 schéisse kënnen. Dëst ass de Werderaner awer net gelongen an esou war et den Hector an der 83. Minutt deen den Ausgläich fir d'Lokalekipp geschoss huet. Mat engem 1:1-Remis sollt de Match dann och op e Enn goen.

Arminia Bielefeld -Union Berlin 0:0

Een 0:0 vun der schlechter Zort tëscht Bielefeld an Union Berlin. An der 1. Hallschent stoung virun allem eng Verletzungspaus am Virdergrond, bei där de Match fir 8 Minutten ënnerbrach gouf. Deemno goufen et eleng an der 1.Hallschent 10 Minutten Nospillzäit. De Luthe ass mam Ryerson no engem héische Ball zesumme geprallt. Béid Spiller konnten awer weider maachen. Déi beschte Chance am Match hat den Nedo an der 78. Minutt, säi Schoss ass awer laanscht de Gol gaangen. Kuerz dorops ass de Stiermer vun Union erëm geféierlech virum Gol opgedaucht, mee och dee Ball sollt säi Wee iwwert d'Linn net fannen, sou dass de Match mat engem 0:0-Gläich ausgaangen ass.

Premier League

FC Liverpool - FC Fulham 0:1
0:1 Lemina (45')

Fulham huet an der 1. Hallschent eng immens couragéiert Leeschtung gewisen. Ënnert dem Impuls vum staarkopspillendem Lookman ass Fulham ëmmer erëm geféierlech virum Gol vun der Lokalekipp opgedaucht. Shaqiri a Milner hate fir d'Reds déi beschte Chancen, hir Bäll sinn awer knapps laanscht de Gol gaangen. Kuerz virun der Paus huet de Lemina no engem Corner zougeschloen, an sou louchen d'Gäscht och net onverdéngt an der Paus mat 1:0 a Féierung. Nom Téi huet Liverpool eng besser Leeschtung gewisen an hat och déi eng oder aner gutt Chance den Ausgläich ze markéieren. Pech hat de Mané deen an der 70. Minutt just de Potto getraff huet. De englesche Meeschter huet wuel alles versicht, mee Fulham sollt de Virsprong iwwert Zäit kréien, sou dass si sech iwwert wichteg 3 Punkten am Ofstigskampf kenne wannen.

Manchester City - Manchester United 0:2
0:1 Bruno Fernandes (2'), 0:2 Shaw (50')

D'Red Devils si perfekt an den Derby géint City gestart. De Jesus huet am Strofraum de Martial zum Fale bruecht an esou ass Eelefmeter fir Manu gepaff ginn, deen de Bruno Fernandes sech net huele gelooss huet. 1:0 Manu. No 19 Spilldeeg louch City deemno mol nees eng Kéier a Réckstand. City ass ëmmer besser an de Match komm allerdéngs sollten d'Skyblues sech keng richteg 100 % Chance erausspillen. No der Paus huet et net laang gedauert an et hätt eng éischte Kéier gerabbelt. De Jesus säi Schoss ass awer just widder d'Lat geknallt. Kuerz dorops huet de Shaw mam 2:0 fir d'Virentscheedung gesuergt. Bei dësem Resultat sollt et dann och bleiwen, sou dass Manchester United de Réckstand op City em 11 Punkte verkierze kann. Fir Manchester City war déi éischten Néierlag no 21. Victoiren um Stéck.

Serie A

AS Roum - CFC Genua 1:0
1:0 Mancini (24')

De Favorit vu Roum ass no engem Corner vum Pellegrini an der 24. Minutt a Féierung gaangen. De Mancini ass am héchste gesprongen an huet de Ball mat voller Wucht an de Filet gekäppt. Roum hat allgemeng gesi méi vum Match an hätt Mëtt vun der 2. Hallschent de Score kéinten op 2:0 setzen, de Potto stoung awer am Wee. D'Lokalekipp huet de Match trotz gudde Chancë vu Genua um Enn iwwert d'Ronn bruecht a steet no der Victoire géint Genua tëschenzäitlech op der 4.Plaz an der Tabell.

Hellas Verona - AC Mailand 0:2
0:1 Krunic (27'), 0:2 Dalot (50')

An der 1. Hallschent hu béid Ekippe kee attraktive Futtball gewisen. Kengem vun deenen 22 Spiller um Terrain ass et gelongen, säi Spill opzezéien, sou dass gutt Chancen éischter seele waren. An awer ass et dem AC gelongen an der 27. Minutt duerch de Krunic a Féierung ze goen. No der Paus ass Milan perfekten an de Match komm an esou war et den Diogo Dalot, deen no enger super Eenzelaktioun de Score op 2:0 erhéicht huet, wat och d'Schlussresultat sollt sinn.

La Liga

Atlético Madrid - Real Madrid 1:1
1:0 Suarez (15'), 1:1 Benzema (88')

Laang huet et dono ausgesinn, wéi wann Atlético de Derby géint Real kéint gewannen. Nom Gol vum Suarez an der 15. Minutt hätte Spiller vum Diego Simone nach virun der Paus de Score kéinten erhéischen, si waren awer ze oneffizient virum Gol. Real huet trotz de Verletzunge vum Sergio Ramos a Carvajal bis zum Schluss gekämpft a sech an der 88. Minutt mam Benzema sengem Gol fir eng gutt Leeschtung, virun allem wat de Wellen ubelaangt, belount.