Den F91 louch schonn no 13 Minutte mat 2:0 a Féierung, Hesper konnt de Réckstand awer ophuelen an de Match nach fir sech entscheeden.

An der BGL Ligue stoungen op Ouschterméindeg eng Rei Matcher um Programm. Dorënner konnt sech ënnert anerem Hueschtert géint Déifferdeng duerchsetzen a fir d'Péiteng ass et eng spéit Victoire géint Nidderkuer ginn.

De Liveticker vun all de Matcher fir nozeliesen.

D'Resuméë vun de Matcher

Diddeleng - Hesper 2:3
1:0 Skenderovic (6'), 2:0 Van den Kerkhof (13'), 2:1 Abdallah (22'), 2:2 Abdallah (33'), 2:3 Stolz (63')

Am Duell tëscht dem Zweeten an dem Drëtten aus der Tabell huet Diddeleng e gudde Start an de Spëtzematch erwëscht. An der 6. Minutt ass e Corner op de Skenderovic um zweete Potto komm, dee vun do aus ongestéiert op 1:0 stelle konnt. E puer Minutte méi spéit gouf et dann eng weider gutt Attack vum F91, déi zum zweete Gol vum Match gefouert huet. Dës kéier war et de Van den Kerkhof, deen no engem Zouspill vum Bettaieb de Ball an de Gol setze konnt. Hesper krut sech awer trotz den zwee fréie Géigegoler gefaangen an huet dann och ëmmer méi de Wee no vir gesicht. An der 22. Minutt konnt den Abdallah dann als éischt op 1:2 verkierzen, ronn 10 Minutte méi spéit da souguer mat sengem zweete Gol zum 2:2 ausgläichen. Dass et e spannenden éischten Duerchgang zu Diddeleng war, huet sech net nëmmen um Spillstand gewisen, ma och um Terrain si béid Ekippen net zur Rou komm.

An der zweeter Hallschent ass d'Intensitéit vun der Partie dann e bëssen erofgaangen, souwuel Diddeleng wéi och Hesper sinn net méi sou dacks zu gudde Golchance komm. Den nächste Gol vum Match sollt dann och no engem rouende Ball falen. Den Ex-Diddelenger Stolz konnt e Fräistouss direkt eraschéissen an de Gaascht doduerch an der 63. Minutt a Féierung bréngen. An de leschten 10 Minutte vum Match huet Diddeleng dann nach eng kéier den Drock erhéicht, ma och d'Awiesslungen hunn um Enn näischt méi bewierkt. Domat wënnt Hesper zum Schlusss no engem 0:2-Réckstand nach mat 3:2 a klëmmt sou op déi zweet Tabelleplaz.

Péiteng - Nidderkuer 1:0
1:0 Lauriente (87')

An enger zimmlech schwaacher éischter Hallschent war Nidderkuer déi Ekipp, déi liicht méi Aktioune virum géigneresche Gol opweise konnt. Dorënner gouf et awer keng sou richteg geféierlech Chance op den 1:0. Péiteng war gläich zwee Mol am Pech, souwuel de Korac wéi och de Schneider hunn den Terrain nach am éischten Duerchgang missen op Grond vun enger Verletzung verloossen. Alles an allem konnt sech de Match an den zweete 45 Minutten nëmme verbesseren.

Dat ass dann och sou geschitt, béid Ekippen hu sech elo méi engagéiert gewisen an och Golchance goufen et ëmmer méi. Zemools de Progrès am Numm vum Shala a Bah hunn op den 1:0 gedréckt, ma déi lescht Konsequenz huet ëmmer nees op sech waarde gelooss. Sou och an der 84. Minutt, wéi de Bah eleng op de Gol gelaf ass, ma am leschte Moment den Ofschloss vum Péitenger Defenseur ofgefälscht konnt ginn. Den 1:0 ass da kuerz drop op der anerer Säit gefall. Dem Lauriente säi Schoss gouf sou deviéiert, dass de Ball onhaltbar fir de Golkipp an de Gol gefall ass a sou war d'Lokalekipp an der 87. Minutt a Féierung. Um Enn ass et och dobäi bliwwen a sou séchert Péiteng e bësse glécklech déi dräi Punkte géint Nidderkuer.

Déifferdeng - Hueschtert 0:1
0:1 Sully (58')

Déifferdeng huet vun Ufank u weise gelooss, dass sie d'Kontroll iwwert de Match wëllen hunn. Hueschtert stoung hanne gutt an huet op déi richteg Momenter gewaart fir séier ëmzeschalten. No 15 Minutte gouf et fir d'Haushären dann déi bescht Chance op den 1:0, wéi de Buch mat sengem Kappball d'Lat getraff huet. Am weidere Spillverlaf ass och Hueschtert vereenzelt virun de géigneresche Gol komm, trotzdeem huet sech bis zur Paus näischt méi gedoen.

Nom Säitewiessel hunn d'Gäscht da besser an de Match fonnt a sou war de Gol nëmmen eng Fro vun der Zäit, dat och well vun Déifferdeng keng Reaktioun op déi Hueschterter Drockphas komm ass. Nodeems de Balde de Ball als leschte Mann verluer hat, hat de Sully fräi Bunn a Richtung Gol a sou ass hie virum Golkipp äiskal bliwwen. No 58 Minutten louch Hueschtert domat a Féierung. Nom 1:0 ass bei der Lokalekipp weiderhin net vill gaangen a sou ass den Déifferdenger och d'Zäit dervu gelaf. Zum Schluss ass et da bei der knapper Victoire fir Hueschtert bliwwen, déi no enger gudder zweeter Hallschent awer och verdéngt ass.

Jeunesse - Etzella 1:1
0:1 Schreiner (30'), 1:1 Laurent (68')

RTL

© Meris Muratovic

Racing - Mondorf 1:0
1:0 Dembélé (90+2')

RTL

© Joel Sauber

Wooltz - Rodange 2:0
1:0 Timmermans (57'), 2:0 Timmermans (84')

RTL

© Numa Wio

D'Tabell vun der BGL Ligue