Mat engem 1:1 trenne sech Hueschtert an d'Jeunesse. Iwwerdeems ka sech Déifferdeng mat 3:1 zu Rodange duerchsetzen a Stroossen klappt Munneref.

Um Sonndeg de Mëtteg war et am nationale Futtball d'Suite vum 20. Spilldag. Nidderkuer huet mat Wolz een direkte Konkurrent an der Course ëm déi véierte Plaz geklappt. Déifferdeng huet sech keen Ausrutscher zu Rodange geleescht, tëscht Hueschtert an der Jeunesse gouf et ee Remis a Stroossen huet auswaërts Munneref keng Chance gelooss.

E Samschdeg hunn ënnert anerem den F91 an d'Fola gewonnen.

De Liveticker vun all de Matcher fir nozeliesen.

D'Resuméë vun de Matcher

US Hueschtert - Jeunesse Esch 1:1
1:0 Trani (59'), 1:1 Koljenovic (Selbstgol, 83')

Hueschtert ass besser an de Match komm a war mat hirem Offensiv-Trio déi eng oder aner Kéier geféierlech virum Escher Gol opgedaucht. Op engem schwéieren Terrain war et fir keng vu béiden Ekippen einfach, ma virun allem d'Jeunesse hat Schwieregkeeten, fir an de Match ze fannen. Bis op zwou Occasiounen ass vun de Gäscht net all ze vill Geféierleches ze notéiere gewiescht.

Nom Säitewiessel war Hueschtert weider déi iwwerleeën Ekipp an huet sech an der 59. Minutt duerch eng flott Eenzelaktioun vum Trani belount. Nodeems den Einsiedler an der 68. Minutt mat Rout vum Terrain geflunn ass, ass et fir d'Jeunesse net méi einfach ginn. Nodeems alles esou ausgesinn huet, wéi wann Hueschtert de Match kéint iwwert d'Ronne bréngen, huet de Koljenovic de Ball no engem Fräistouss an den eegene Filet gekäppt an d'Jeunesse esou zeréck an de Match bruecht. D'Gäscht hunn an de leschte Minutten nach op d'Victoire gespillt, et sollt an dësem Match awer kee Gol méi falen, sou dass béid Formatioune sech mat engem Punkt mussen zefridde ginn. 

Progrès Nidderkuer - FC Wooltz  2:0
1:0 Habbas (17'), 2:0 Habbas (77')

No enger gudder Leeschtung Klappt de Progrès Wooltz mat 2:0
Nidderkuer war gefuerdert an huet dann och ofgeliwwert. Bei Wolz huet et an der Offensiv um néidege Bëss gefeelt.

De Ralph Schon war an der 1. Hallschent ouni Zweiwel de beschte Wooltzer, wat gläichbedeitend heescht, dass Nidderkuer eng richteg gutt éischt Hallschent gewisen huet. De Golkipp vun de Gäscht huet déi eng oder aner Kéier in extremis fir seng Ekipp konnte retten. An der Offensiv haten de Phillips an den Ibrahimovic Chancen, konnten déi awer net notzen. Aneschters huet op der Säit vun Nidderkuer ausgesinn. No Viraarbecht vum Klapp stoung den Habbas an der 17. Minutt goldrichteg an huet seng Faarwe mat 1:0 an d'Paus geschoss.

Nom Téi hu béid Formatiounen e bësse gebraucht, bis si bei ongemittleche Wiederkonditiounen nees op Temperatur komm sinn. An der Suite huet sech awer e flotte Match tëscht béiden Ekippen entwéckelt, bei deenen de Progrès méi wéi eng Chance hat, de Score op 2:0 ze setzen. Ronn 10 Minutte viru Schluss war et dunn esou wäit. Den Habbas mat sengem zweete perséinlechem Gol per Eelefmeter huet de Match virentscheet. Bei Wolz huet de leschte Bëss gefeelt, sou dass dës Victoire fir de Progrès verdéngt ass. Domadder huet Nidderkuer an der Course ëm déi véiert Plaz an der Tabell een direkte Konkurrent geklappt.

RTL

Nidderkuer - Wooltz / © Christophe Mersch

FC Rodange - FC Déifferdeng 1:3
0:1 Komano (35'), 1:1 Njo-Lea (55'), 1:2 Semedo (Selbestgol, 60'), 1:3 Prudhomme (61')

US Munneref - Una Stroossen 1:4
1:0 Fehlen (9'), 1:1 Hayasaka (40'), 1:2 Runser (44'), 1:3 Schmit (65'), 1:4 Bernardelli (90+2')

RTL

© Joel Sauber

D'Tabell vun der BGL Ligue