Als Ligener a Schlaangen huet den Alexander Ceferin d'Auteure vun der Super League bezeechent.

An senger Usprooch vu Montreux an der Schwäiz huet den Uefa-President kee gutt Hoer um Projet vun 12 Toppclibb gelooss. Hie wier 24 Joer laang Penalist gewiescht an hätt vill gesinn, mee sou eppes nach net. De Slowen huet dann och direkt haart Strofen ugekënnegt. "Déi Spiller, déi an der Super League dobäi sinn, wäerte keng WM an EM méi spillen".

D'Reaktioun vum Haaptresponsabele vun der Super League huet natierlech net laang op sech waarde gelooss.

"Ëmmer wann et eng Verännerung gëtt, ginn et Leit, déi dogéint sinn", esou de Florentino Perez an engem Interview an der spuenescher Emissioun "El Chiringuito de Jugones". All d'Kritiker vun der Super League hält de Real-Madrid-Boss fir falsch. De 74 Joer ale Spuenier gesäit sech an déi 12 Grënnungsveräiner vun der Super League als Retter vum Futtball.

"Wa Leit soen: dat sinn déi Räich - Nee. Ech sinn net de Proprietär vu Real Madrid. Real Madrid ass e Member an alles, wat ech maachen, ass zum Wuel vum Futtball. Mir maachen dat, fir de Futtball, deen an enger kritescher Situatioun ass, ze retten".

RTL

© AFP

D'Pandemie hätt d'Kris verschäerft an et géifen net méi genuch Profitter generéiert. D'Champions-League-Reform fir d'Joer 2024 hält de Perez fir onbrauchbar. "Si soen d'Reform kënnt 2024. 2024 si mir alleguer dout". En plus ass d'Champions League eréischt vun der Véierelsfinall un attraktiv. Bei der Super League wier dat anescht. "Wann déi Grouss ënnertenee spillen, dann ass d'Konkurrenz grouss. Dat ass méi flott fir de Fernsee an et generéiert méi Ressourcen." Mat de Monopoler wier et elo eriwwer, sou de Chef vum Real.

"A mir wäerte sécher net aus der Champions League fléien an och net aus dem spuenesche Championnat. D'Uefa huet kee gudden Image. Ech wëll elo net alles opzielen, wat passéiert ass, mee d'Uefa soll en Dialog féieren an net droen."

De Karl-Heinz Rummenigge ass iwwerdeems neie Member am Exekutiv Comité vun der Uefa. Dëst gouf en Dënschdeg um Kongress vum europäesche Futtballverband decidéiert, nodeems den Andrea Agnelli wéinst dem Sträit ëm d'Super League säi Posten huet missten opginn.

De President vun der Juventus ass jo eng vun den Haaptfiguren an der neier Super League. De Rummenigge iwwerhëlt domat de Sëtz am Exekutiv a vertrëtt do an éischter Linn Interessi vun der ECA, der European Club Association.

Déi 55 Futtballfederatioune vun der Uefa, dorënner och Lëtzebuerg, hunn de Projet vun där sougenannter Super League vun 12 europäeschen Toppveräiner unanime verurteelt. Um Kongress vun der europäescher Futtball-Unioun war en Dënschdeg och den FLF-President Paul Philipp dobäi.

Paul Philipp am Interview/Reportage Franky Hippert

"Deen éischte Schock war jo gëscht, dat war jo och esou gewollt. Mä et ass ganz kloer, an all Ried, déi gehale gouf, et war och Unanimitéit bei der Condamnatioun. Et ass och e Schreiwes verfaasst ginn, wou déi 55 national Verbänn dat verdaamt hunn.", esou de Paul Philipp en Dënschdeg.

An de leschte Stonne war dann och d'Fuerderung ze héieren, datt déi Veräiner, déi herno bei där Super League matmaachen, elo schonn aus der Champions League sollen ausgeschloss ginn.

"Et ass net konkret gesot ginn, datt Manchester City oder Real Madrid d'Champions League net däerfe fäerdeg spillen, wann et dann iwwerhaapt eng Kéier zu där Super League kënnt. Mä et gesäit een elo och, datt den Drock vun deene Wichtegsten, de Supporter, méi grouss gëtt.", erkläert den FLF-President.