Iwwerdeems spillen de Swift an de Progrès an engem spannendem Match 1:1-Gläich.

E Mëttwoch hätten am nationale Futtball 8 Matcher sollte gespillt ginn. De Match tëscht Munneref géint Hamm huet misse wéinst Coronafäll bei de Gäscht ofgesot ginn. Och d'Partie tëscht dem Leader an der Tabell der Fola a Wolz war scho wéinst Coronainfektiounen annuléiert ginn.

Domat stoungen den Owend nach 6 weider Matcher um Programm, wou sech ënnert anerem de Racing a Stroossen konnten duerchsetzen.

BGL Ligue - Reportage vum Serge Olmo

De Liveticker vun all de Matcher fir nozeliesen.

D'Resuméë vun de Matcher

FC Déifferdeng03 - Jeunesse Esch 1:2
0:1 Ouwo Moussa (63'), 0:2 Bernard (65'), 1:2 De Taddeo (75')

BGL Ligue am Futtball
An der Course ëm déi 4. Plaz an der Tabell stounge sech Déifferdeng an d'Jeunesse direkt géigeniwwer.

An der Course ëm déi 4. Plaz an der Tabell stounge sech Déifferdeng an d'Jeunesse direkt géigeniwwer. An der 1. Hallschent huet sech d'Jeunesse wuel déi besser Chancen erausgespillt, dat virun allem duerch e gutt opgeluechten Ouwo Moussa. D'Lokalekipp hat wuel méi Ballbesëtz, huet awer déi néideg Prezisioun am leschten Drëttel vermësse gelooss. Alles an allem huet sech awer keng vu béiden Ekippe kloer Virdeeler konnten erspillen, sou dass et mat engem 0:0-Gläich an d'Paus gaangen ass.

Nom Téi ass Esch quasi mat der éischter richteger Golchance direkt a Féierung gaangen. De Ouwo Moussa huet de Ball mat engem schéine Lob am Filet ënnerbruecht. Ganzer 2 Minutte méi spéit huet et dunn erëm am Déifferdenger Gol gerabbelt. De Bernard huet an der 65. Minutt fir den Duebbelschlag gesuergt. D'Lokalekipp ass mam de Taddeo wuel nach emol erukomm (75'), fir den Ausgläich sollt et um Mëttwochowend awer net méi duergoen. Eng immens wichteg Victoire fir d'Jeunesse, déi elo an der Tabell 5 Punkte virun Déifferdeng op der 4. Plaz leien.

RTL

© Bob Leven

Swift Hesper - Progrès Nidderkuer 1:1
0:1 Tekiela (12'), 1:1 Stolz (50')

De Swift ass wuel besser aus de Kabinne komm, huet awer séier missen erkennen, dass de Progrès e staarken Dag erwëscht huet. An esou war et den Tekiela, deen de Ball no ronn 12. Minutten an de Gol gelupft huet an d'Gäscht domat mat 1:0 a Féierung geschoss huet. Nodeems Nidderkuer et an der Suite net gelongen ass, hir gutt Chancen op den 2:0 ze notzen, ass Hesper lues a lues besser an de Match komm. E Gol sollt der Lokalekipp an enger equilibréiert 1. Hallschent awer net geléngen, sou dass et aus der Siicht vum Swift mat 0:1 an d'Kabinne gaangen ass.

Hesper ass mat 100 à l'heure aus dem Vestiaire komm an hat direkt eng richteg gutt Chance duerch de Stolz. Nëmmen 2 Minutten drop huet de Mëttelfeldspiller vum Swift et du besser gemaach a konnt de Score op 1:1 ausgläichen. Dono huet sech de Match wat Offensivaktiounen ubelaangt berouegt. Vill Feeler op béide Säiten hunn de Match an der 2. Hallschent gepräägt. Et huet ee gemierkt, dass den Drock bei béiden Ekippen op de Schëllere géif leien, sou dass de Match um Enn mat engem 1:1-Gläichspill op en Enn geet.

RTL

Hesper- Nidderkuer / © Kevin Estebanez

Etzella Ettelbréck - F91 Diddeleng 0:3
0:1 Bettaieb (9'), 0:2 Bettaieb (37'), 0:3 Muratovic (88')

Diddeleng ass immens gutt an de Match komm an huet d'Lokalekipp direkt ënner Drock gesat. No ronn 9 Minutten ass den F91 dann och a Féierung gaangen, dat nodeems de Bettaieb de Ball placéiert an de Filet geschoss huet. Keng Chance fir den de Witte am Ettelbrécker Gol. Diddeleng huet nom Gol d'Intensitéit zréckgeschrauft an de Match relativ sécher kontrolléiert. Bei der Etzella ass offensiv näischt zesumme gelaf an esou si si zu kenge geféierlechen Aktioune komm. Eng ronn 10 Minutte virun der Paus huet de Bettaieb mat sengem perséinlechen 2. Gol fir 2:0 d'Pauseresultat gesuergt.  

Nom Säitewiessel huet sech de Match neutraliséiert. Et hat een d'Impressioun, dass bei der Etzella net méi géif goen an Diddeleng war scheinbar zefridde mam Resultat. Den F91 huet déi zweet 45 Minutte geréiert, ouni sech grouss Golgeleeënheeten erauszespillen. Eng ronn 10. Minutte viru Schluss hat Ettelbréck nach eng riseg Chance, de Ball sollt de Wee awer net an de Filet fanne. Diddeleng gewënnt nach duerch e Gol an der Schlussphas vum Muratovic verdéngt mat 3:0 zu Ettelbréck.

FC Rodange - Racing Union 0:4
0:1 Simon (39'), 0:2 Dembélé (55'), 0:3 Nakache (65'), 0:4 Dembélé (73')

US Hueschtert - Una Stroossen 2:4
0:1 Runser (6'), 1:1 Lusala (36'), 1:2 Lopes (36'), 1:3 Bernardelli (38'), 2:3 Selbstgol (60'), 2:4 Lourenco (72')

RTL

Hueschtert - Stroossen / © Eugène Thommes

Victoria Rouspert - Union Titus Péiteng 3:0
1:0 Leroux (5'), 2:0 De Rossler (33'), 3:0 Leroux (66')

RTL

Rouspert- Peiteng / © Felix Girst

D'Tabell vun der BGL Ligue