E Méindeg den Owend stoung an der däitscher Bundesliga nach en Nodrosmatch vum 29. Spilldag um Programm.

Den FSV Mainz 05 mam Lëtzebuerger Nationalspiller Leandro Barreiro krut Besuch vun Hertha Berlin. Et war fir béid Ekippen eng wichteg Partie am Kampf ëm de Maintien. Déi Mainzer hate virun dëser Partie 7 Matcher hannerteneen net méi an der Bundesliga verluer. Béid Ekippen hu sech mat engem 1:1 getrennt. Bei de Mainzer stoung de Leandro Barreiro Martins déi 90 Minutten um Terrain, krut an der 72. Minutt allerdéngs eng giel Kaart wéinst engem Foul um Marton Dardai. Fir den Tabellenzweetleschte Berlin war et deen éischte Match no senger Corona-Quarantän. Mainz bleift an der Tabell op der 12. Plaz mat elo 35 Punkten, 6 Punkten Avance op d'Relegatiounsplaz, op där Köln steet.

An der Segunda Liga a Portugal huet d'Ekipp vum Eric Veiga 1:3 géint Varzim verluer. De Lëtzebuerger, dee fir Vilafranquense spillt, souz wärend dem ganze Match op der Ersatzbänk.

Sonndeg

An der Ukrain konnt den 23 Joer jonken Enes Mahmutovic den entscheedende Gol markéieren. Bei der 2:1-Victoire vu Lviv géint Mariupol stoung de Lëtzebuerger als Kapitän vu Lviv déi 90 Minutten um Terrain. An der 89. Minutt konnt hien den entscheedende Gol markéieren.

An der Schwäiz gouf et fir de Champion Young Boys Bern eng 1:2-Defaite géint Genf. De Christopher Martins gouf bei Bern an der 66. Minutt beim Stand vun 0:0 ausgewiesselt. Fir Bern war et eréischt déi zweet Néierlag an dëser Saison.

An der hollännescher Eredivisie stoung um Sonndeg am Kader vum 31. Spilldag de Match tëscht Groningen a Sparta Rotterdam um Programm. Bei der 2:1-Victoire vu Sparta Rotterdam souz de Lëtzebuerger Mica Pinto bei Rotterdam déi 90 Minutten op der Bänk. Sparta Rotterdam klëmmt duerch dës Victoire op déi 9. Tabelleplaz.

An der 2. Liga a Portugal huet Casa Pia géint Academico Viseu 0:0 gläich gespillt. De Marvin Martins stoung bei der Lokalekipp vun Ufank un um Terrain a krut an der 35. Minutt déi giel Kaart gewisen. Casa Pia steet am Mëttelfeld vun der Tabell.

Samschdeg

An der ukrainescher Premier League ass et e Samschdeg zum Duell tëscht zwee Lëtzebuerger Nationalspiller komm. Den Gerson Rodrigues konnt sech mat Dynamo Kiew mat 5:1 géint d'Ekipp vum Olivier Thill, Vorskla Poltava, duerchsetzen an dobäi ee Gol schéissen.

Fir Waasland-Beveren gouf et am Match géint den RFC Seraing en 1:1-Remis. Den Danel Sinani war beim Punktgewënn vu senger Ekipp de ganze Match am Asaz. Et war dëst den Allersmatch vun der Relegatioun. Den nächste Weekend fält d'Decisioun ob Waasland-Beveren och déi nächst Saison an der héchster Divisioun an der Belsch däerf spillen oder net.

De Laurent Jans stoung op en Neits net am Kader vum Standard Léck. Ouni de Lëtzebuerger Nationalspiller huet de Standard fir den Optakt vun der Conference-League-Grupp mat 2:6 géint Ostende de Kierzere gezunn.

Den New York City FC huet sech um drëtte Spilldag an der MLS mat 2:0 bei Philadelphia Union duerchgesat. De Maxime Chanot hat sech am Training blesséiert a stoung net am Kader. No dräi Matcher huet New York City sechs Punkten um Kont.

Am Portugisesche Championnat ass Nacional Funchal zu Lissabon ouni de Vincent Thill ugetrueden. Beim Tabelleleader gouf et fir d'Coequipiere vum Lëtzebuerger eng 0:2 Néierlag géint de Leader. Nacional Funchal steet iwwerdeems op der leschter Plaz.