Den Olivier Thill konnt den 1:0 markéieren. Um Enn spillt Poltava 1:1 géint Desna. De Sebastien Thill steet an der Finall vun der Coupe a Moldawien.

An der éischter Ukrainescher Liga ass den Olivier Thill mat Poltava op Desna getraff. Den Olivier Thill konnt mat sengem 2. Gol vun dëser Saison seng Ekipp a Féierung bréngen mee de Match ass mat 1:1 op en Enn gaangen.

An der nämlechter Divisioun spillt Dynamo Kiew 0:0 géint Mariupol. De Gerson Rodrigues gouf an der 75. Minutt agewiesselt. Dynamo Kiew ass io scho Meeschter an der Ukraine.

En Donneschdeg den Owend war dann och nach den Enes Mahmutovic am Asaz an der éischter ukrainescher Liga. Hien huet mat Lviv mat 0:1 géint Inhulets verluer.

An der Coupe a Moldawien konnt sech de Sebastien Thill mat Sheriff Tiraspol fir d'Finall qualifizéieren. Mat 3:1 konnten se géint Petroclub an der Halleffinall gewannen. De Lëtzebuerger Nationalspiller gouf fir déi zweet Hallschent agewiesselt.

An der 3. däitscher Liga verléiert de Maurice Deville mat Saarbécken mat 0:3 géint Magdeburg. De Lëtzebuerger gouf an der 33. Minutt fir de blesséierten Zellner agewiesselt. Saarbrécken steet an der Tabell mat 55 Punkten op der 5. Plaz.