Béid Lëtzebuerger Legionäre konnten um leschte Spilldag an der Ukrain wichteg Victoiren afueren a sech iwwer 3 Punkte freeën.

An der Ukrain war de Gerson Rodrigues mat Kiew op Besuch beim Tabelle-4. vu Kolos Kovalivka. Hei gouf et fir de Veräin vum Lëtzebuerger eng kloer 3:0-Victoire ze feieren. De Gerson Rodrigues stoung bei Kiew an der éischter 11 a gouf an der 72. Minutt bei Stand vun 3:0 ausgewiesselt. Kiew mam Rodrigues stoung jo scho virum leschte Spilldag als Champion fest.
Fir den Oli Thill gouf et och ee Grond fir ze feieren. Bei der 2:1-Victoire vu Vorskla Poltava beim Tabelleleschten aus Minaj stoung de Lëtzebuerger Nationalspiller déi 90 Minutten iwwer um Terrain. Fir Poltava war et eng wichteg Victoire an der Lutte ëm déi 5. Tabelleplaz, déi d'Qualifikatioun fir d'Europa League bedeite géif.
Iwwerdeems konnt den Enes Mahmutovic mat Lviv ee Punkt géint Olimpik Donezk sammelen. De Lëtzebuerger Defenseur stoung déi 90 Minutten um Terrain.

An der 2. Liga a Portugal gouf et fir Casa Pia mam Marvin Martins eng 1:2-Defaite géint den Tabellendrëtten Arouca. D'Ekipp vum Martins steet elo mat 40 Punkten no 32. Spilldeeg op der 10. Tabelleplaz. De Lëtzebuerger stoung dee ganze Match iwwer um Terrain.

An der däitscher Bundesliga konnt Mainz ee wichtege Punkt géint Frankfurt feieren. D'Ekipp vum Leandro Barreiro war beim 1:1-Remis géint Frankfurt laang a Féierung. Um Enn steet fest, dass Mainz net méi direkt ofsteige kann. De Lëtzebuerger stoung beim Remis 89 Minutten um Terrain.

Samschdeg

An der Belsch stoung de Laurent Jans e Samschdeg den Owend bei der Victoire vum Standard vun Ufank un um Terrain. De Lëtzebuerger Nationalspiller a seng Coequipieren hu mat 2:1 géint Gent gewonnen. Nom zweete Spilldag an der Conference-League-Grupp steet Léck op der zweeter Plaz.

Kee gudden Owend war et fir Waasland-Beveren. Am Relegatiounsmatch huet een nom 1:1 am Allersmatch de Retourmatch géint Seraing kloer mat 2:5 verluer. Domadder steigt Waasland-Beveren of a Seraing spillt déi nächst Saison an der héchster Divisioun. Den Danel Sinani stoung bei Waasland-Beveren vun der éischter Minutt un um Terrain an huet an der 51. Minutt den tëschenzäitlechen 2:2-Ausgläich geschoss.

An der Schwäiz hunn d'Young Boys Bern mat 2:0 géint Basel gewonnen. De Christopher Martins stoung an der Startformatioun an huet an der 72. Minutt mat sengem Gol fir d'Schlussresultat gesuergt.

E Samschdeg huet Sheriff Tiraspol am moldawesche Championnat wuel mat 1:0 géint Zimbru Chisinau gewonnen, ma de Verfolger Petrocub huet sech och dräi Punkte geséchert. De Sébastien Thill souz bei Tiraspol de ganze Match op der Bänk. Fënnef Spilldeeg viru Schluss huet den FC Sheriff an der Tabell e Virsprong vun 13 Punkten.

An der 3. Liga an Däitschland huet um 36. Spilldag Saarbrécken zu Ingolstadt 0:0 gespillt. De Lëtzebuerger Maurice Deville souz bei de Gäscht déi 90 Minutten op der Bänk. An der Tabell steet Saarbrécken no 36 Spilldeeg mat 56 Punkten op der 5. Plaz. Ingolstadt ass Véierten a kann nach Opsteigen.

An der 2. Bundesliga an Däitschland huet de Karlsruher SC bei Greuther Fürth 2:2 gläich gespillt. Den Dirk Carlson stoung bei Karlsruhe net am Kader. 2 Spilldeeg viru Schluss steet de KSC op der 8. Plaz an der Tabell. Fürth spillt nach ëm den Opfstig an do kéint de Remis vun e Samschdeg nach wéidoen.

Freideg

Fir de Kont vum 32. Spilldag an der Eredivisie an Holland huet Sparta Rotterdam e Freideg den Owend géint Vitesse Arnheim gespillt. Fir Rotterdam gouf et no 90 Minutten eng 3:0-Victoire. De Lëtzebuerger Nationalspiller Mica Pinot souz de ganze Match iwwer op der Bänk. En vue vun enger méiglecher Qualifikatioun fir d'Conference-League-Playoffs war et eng wichteg Victoire fir Rotterdam.