Am Nodrosmatch vum 31. Spilldag konnten d'Berliner e Réckstand dréinen a sech nach mat 2:1 géint den Tabelleleschte behaapten.

E Mëttwoch den Owend stoung an der däitscher Bundesliga en Nodrosmatch vum 31. Spilldag um Programm. Am Géigesaz zu Schalke war et fir d'Hertha weiderhi wichteg Punkten ze sammelen, fir och déi nächst Saison an der 1. Bundesliga ze spillen.

Allerdéngs huet den Tabelleleschten de bessere Start erwëscht a konnt no 6 Minutten duerch e Gol vum Harit a Féierung goen. Mat der Zäit huet d'Ekipp aus der däitscher Haaptstad dann awer ëmmer méi de Match u sech gerappt a konnt d'Partie sou nach duerch Goler vum Boyata an Ngankam dréinen. Um Enn steet eng 2:1-Victoire fir d'Hertha, déi elo zwee Spilldeeg viru Schluss dräi Punkte Virsprong op d'Relegatiounsplaz huet.

3 wichteg Punkte gouf et an der Premier League och fir Arsenal London géint den FC Chelsea. Am Haaptstad-Derby konnt Arsenal sech auswäerts 1:0 duerchsetzen, duerch e Gol vum Rowe an der 16. Minutt a bleift domadder un den internationale Plazen drun.

An der La Liga konnt sech den aktuelle Leader Atlético 2:1 géint de 5. Real Sociedad duerchsetzen. Schonn enger knapper hallwer Stonn hat d'Heemekipp en 2:0 Avantage, no Goler vum Cerreira Carrasco a Correa, Sociedad konnt an der 83. Minutt duerch den Zubeldia treffen, ma méi sollt net méi nokommen. An der Tabell huet Atlético aktuell 4 Punkten Avance op Barcelona, 5 op Real Madrid a 6 op Sevilla, ma Real huet nach ee Match manner.

Inter Mailand steet an der Serie A jo schonn als Gewënner fest, ma dohannert gëtt sech nach hefteg ëm déi Internional Plaze gestridden. Souwuel Bergamo, wéi och den AC Mailand, Juventus a Lazio konnten hir Matcher gewannen, esou datt tëscht dem 2. Bergamo (75 Punkten) an dem 6. Lazio (67 Punkten, awer ee Match manner) net vill Ënnerscheet läit. De klengste Feeler kann aktuell hei entscheeden, ob e Veräin et an d'Champions League packt, oder sech just fir d'Europa League qualifizéiert.

All d'Resultater am Iwwerbléck