En Donneschdeg den Owend stoung an Däitschland d'Finall vum DFB-Pokal um Programm, déi mat enger 4-1 Victoire un de BVB gaangen ass.

An fir déi Dortmunder huet de Match richteg gutt ugefaangen. No engem Ballverloscht vum Kampl huet de BVB séier ëmgeschalt, bei der Konterattack gouf de Sancho net konsequent genuch ugegraff an esou konnt de jonken Englänner schonns an der 5. Minutt den 1:0 fir Dortmund markéieren.

Leipzig huet sech offensiv schwéier gedoen, sech Chancen erauszespillen, dat well de BVB an der Defensiv ganz stabil stoung.

An an der 28. Minutt konnt d'Borussia dunn esouguer nach erhéijen. De Reus huet den Haaland lancéiert an dee konnt de Ball aus kuerzer Distanz an de Gol schéissen.

An der Schlussphas vun der éischter Hallschent hat Leipzig dunn déi éischt besser Chancen, nawell krute si an der Nospillzäit vun der éischter Hallschent nach en 3. Géigegol geschoss. Op en Neits war et de Sancho, dee markéiere konnt.

No 24 Sekonnen an der zweeter Hallschent hat den agewiesselten Nkunku dunn déi grouss Chance op den éischte Gol vun RB, ma de Fransous huet just d'Lat getraff.

D'Ekipp vum Trainer Julian Nagelsmann ass an der zweeter Hallschent besser ginn, ma si hunn och elo méi misse riskéieren. Ma och Dortmund war weiderhi ganz geféierlech an der Offensiv.

An der 71. Minutt konnt RB Leipzig dunn duerch den Dani Olmo op 1:3 verkierzen. Leipzig huet um Enn nach eemol alles no vir geheit, ma e weidere Gol sollt hinnen net méi geléngen. Am Géigendeel den Haaland huet nach e weidere Gol fir Dortmund geschoss, esou datt de BVB d'Finall vum DFB-Pokal mat 4:1 gewënnt.

Premier League

Liverpool kënnt enger Champions League Plaz méi no

En Donneschdeg den Owend huet Liverpool auswäerts duerch Goaler vu Salah, Diogo Jota a Firmino gewonnen. Leschtgenannte konnt d'Reds mat sengen zwee Goaler kuerz virun an no der Paus a Féierung bréngen, nodeems de Bruno Fernandes a Diogo Jota scho getraff haten. An der 68.Minutt konnt den Rashford fir d'Heemekipp nach eng Kéier verkierzen, ier de Salah an der leschter Minutt fir d'Entscheedung suerge konnt.

Domat klëmmt Liverpool op déi 5.Plaz am englesche Championnat a steet mat 10 Punkte Réckstand op den Tabellenzweete Manchester United op enger Europa League Plaz.

D'Partie, déi fir den 2.Mee programméiert war, huet opgrond vu Fan-Protester géint d'Besëtzer vu Manchester United an hirer geplangter Participatioun un der European Super League misse verluecht ginn.