Den Däitschen huet sech ouni Problemer an dräi Sätz géint den Alejandro Davidovich Fokina behaapt.

Zu Roland Garros, dem zweete Grand-Slam-Tennistournoi vum Joer, steet den Alexander Zverev fir d'éischte Kéier a senger Karriär an den Halleffinallen. D'Nummer 6 op der Welt hat keng Problemer géint den Alejandro Davidovich Fokina (ATP 46). Den Däitschen huet sech kloer an dräi Sätz mat 6:4, 6:1 a 6:1 géint de Spuenier behaapt.

Am Toppmatch huet sech de Stefanos Tsitsipas an 3 Sätz mat 6:3, 7:6 a 7:5 géint de Russ Daniil Medvedev duerchgesat. De Griich spillt an der Halleffinall elo géint den Zverev.

Bei den Damme steet d'Tamara Zidansek an der Halleffinall. D'Slowenin, Nummer 85 an der Weltranglëscht, huet sech an enger spannender 1/4-Finall an 3 Sätz, 7:5, 4:6 an 8:6 géint d'Spuenierin Paula Badosa duerchgesat.

Déi 23 Joer al Zidansek steet fir déi éischte Kéier an hirer Karriär an der Ronn vun deene leschte 4 bei engem Grand Slam. Hei kritt si et mam Anastassija Pawljutschenkowa ze dinn.

D'Russin huet sech an dräi Sätz mat 6:7 (2:7), 6:2 an 9:7 géint d'Kasachin Elena Rybakina behaapt.