No 2 Joer huet de Spuenier nees eng Kéier e Saz bei de French Open missen ofginn.

De Rafael Nadal steet beim zweete Grand-Slam-Tournoi vum Joer an den Halleffinallen an huet weider säi 14. Titel fest am Bléck. De 35 Joer ale Roland-Garros-Rekordgewënner huet den Argentinier Diego Schwartzman an der Véierelsfinall e Mëttwoch mat 6:3, 4:6, 6:4 a 6:0 geklappt. No joresiwwergräifend 36 gewonnene Sätz huet de Spuenier nees eng Kéier ee Saz ofginn.

An den Halleffinallen trëfft den Nadal elo op d'Nummer 1 vun der Welt, Novak Djokovic, deen e Mëttwoch a 4 Sätz mat 6:3, 6:2, 6:7 a 7:5 géint den Italiener Matteo Berrettini gewonnen huet.

Bei den Dammen huet déi 17 Joer al US-Amerikanerin Cori Gauff (WTA 25) e Mëttwoch an de Véierelsfinallen an 2 Sätz mat 6:7 (6:8) an 3:6 géint d'Barbora Krejčíková (WTA 33) verluer. Fir béid Spillerinne war et déi éischt Kéier, datt si bei de French Open an de Véierelsfinalle stoungen.

D'Tschechin spillt elo géint d'Griichin Maria Sakkari ëm en Ticket fir d'Finall. D'Sakkari huet sech an zwee Sätz mat 6:4 a 6:4 géint d'Titelverdeedegerin Iga Swiatek behaapt.