Nodeems de Match wéinst enger Malaise vum Christian Eriksen ënnerbrach gouf, konnt sech Finnland um Enn nach mat 1:0 géint Dänemark behaapten.

2. Spilldag Futtball-EM / Rep. Gilles Tricca

Op engem opreegenden zweeten Dag vun der Europameeschterschaft hunn d'Ekippe vu Wales a Schwäiz e Samschdeg de Mëtteg den Optakt gemaach. Am Olympiastadion zu Baku gouf et no 90 Minutte bei engem 1:1-Remis kee Gewënner. Den Embolo konnt d'Schwäizer kuerz no der Paus verdéngt a Féierung bréngen, ma an der 74. Minutt war et de Moore, dee fir d'Waliser ausgeglach huet.

Den zweete Match vum Dag gouf kuerz virun der Paus duerch eng Malaise vum Christian Eriksen ënnerbrach. Den däneschen Nationalspiller war ouni Friemawierkung um Terrain vu sech gaangen, konnt méi spéit awer reaniméiert an an d'Spidol bruecht ginn. No deem Schock gouf trotzdeem weidergespillt, dat op Wonsch vun der dänescher an der finnescher Ekipp. Um Enn wënnt Finnland de Match géint Dänemark duerch e Gol vum Pohjanpalo mat 1:0. Och wann d'Resultat op dësem Dag éischter zweetrangeg ass, hunn d'Finnen hir éischt dräi Punkten am Grupp B gesammelt.

An der leschter Partie vum Dag gouf et dann nach eng verdéngt 3:0-Victoire fir d'Belsch géint Russland. No de Goler vum Lukaku an dem Meunier stoung schonn an der Paus eng 2:0-Féierung, déi an den zweete 45 Minutten net méi vun de Russe gedréint konnt ginn. Kuerz viru Schluss konnt de Lukaku souguer nach ee Gol dropleeën a sou séchert sech d'Belsch duerch eng gutt Leeschtung mat enger 3:0-Victoire déi éischt dräi Punkten am Grupp B.

Stëmmt mat of