De Sterling huet an der 57. Minutt den decisive Gol fir d'Three Lions geschoss. Bei den Hollänner huet den Dumfries fir d'Decisioun gesuergt.

Resumé Futtball-EM / Reportage Guy Seyler

E Sonndeg stoung zu London bei der Europameeschterschaft am Futtball am Grupp D d'Neioplo vun der WM-Halleffinall 2018 tëscht England a Kroatien um Programm. No 90 Minutte konnte sech d'Englänner, déi bei der EM zum Favorittekrees gehéieren, d'Victoire sécheren an domadder Revanche fir d'Néierlag bei der WM huelen. Den decisive Gol huet de Sterling an der 57. Minutt geschoss.

De Succès fir d'Three Lions geet um Enn an d'Rei. D'Kroate si géint deels drockvoll Englänner nëmme seelen an de Strofraum vum Géigner komm an déi puer Golchancë waren och ze harmlos. Bis ewell haten d'Englänner nach ni am éischte Match bei enger EM gewonnen, dat hu se mam Match e Sonndeg deemno geännert.

An de leschte Minutte vum Match gouf et dann och nach een historeschen Ament. Bei den Englänner ass den Dortmunder Bellingham op den Terrain komm, deen duerch seng Awiesslung zwou Woche viru sengem 18. Gebuertsdag elo dee jéngsten EM-Spiller vun allen Zäiten ass.

An der zweeter Partie vun e Sonndeg stounge sech am Grupp C Éisträich an Nordmazedonien géintiwwer. D'Éisträicher konnte sech no Goler vu Lainer (18'), Gregoritsch (78') an Arnautovic (89') mat 3:1 behaapten. Fir Nordmazedonien hat de Pandev an der 28. Minutt tëschenduerch op 1:1 ausgeglach. Fir Éisträich ass et déi éischt Victoire bei enger EM.

Am leschte Match vum Dag huet Holland mat 3:2 géint d'Ukrain gewonnen. D'Hollänner louche scho mat 2:0 a Féierung, ier d'Ukrain ausgläiche konnt. Fir d'Decisioun huet kuerz viru Schluss den Dumfries gesuergt.

Holland war an den éischte 45 Minutten déi kloer besser Ekipp, ma konnt trotz enger Partie gudder Chancë kee Gol markéieren. Mam 0:0 ass et an d'Paus gaangen.

Nom Téi huet de Wijnaldum an der 52. Minutt d'Oranje verdéngt mat 1:0 a Féierung bruecht. Nëmme 7 Minutte méi spéit huet de Weghorst op 2:0 erhéicht. Et huet deemno no enger souveräner Victoire vun den Haushären zu Amsterdam ausgesinn. Mä d'Ukrain sollt duerch Goler vum Yarmolenko (75') a vum Yaremchuk (79') nees zeréck an de Match kommen. Um Enn konnten d'Hollänner awer nach den decisive Gol markéieren. Den Dumfries huet mam 3:2 an der 85. Minutt déi verdéngt dräi Punkte geséchert.

News, Statistiken, Radio-Reportagen, Pronostickespill, Quiz, ...

Stëmmt mat of