Hesper an de Racing mussen am 1. Tour vun der Qualifikatioun untrieden. De Swift spillt géint Domzale an de Racing géint Breidablik.

En Dënschdeg war déi éischte Kéier an der Geschicht vun der Uefa, datt déi nei Kompetitioun d'Conference League ausgeloust gouf. An der éischter Ronn vun der Qualifikatioun kritt de Swift Hesper et fir d'éischt auswäerts mat Domzale aus Slowenien ze dinn. De Stater Racing spillt fir d'éischt doheem géint Breidablik aus Island. D'Allersmatcher sinn donneschdes, den 8. Juli an de Retour eng Woch méi spéit. Den F91 war, am Géigesaz zum Racing an Hesper déi am éischten Tour mussen untrieden, fir dësen zweeten Tour direkt gesat. Déi Diddelenger spillen entweder géint d'Islänner vu Stjarnan oder géint den FC Bohemian aus Irland.

D'Allersmatcher sinn den 22. Juli an de Retour eng Woch méi spéit.

Am Fall vun engem Succès am éischten Tour géif de Racing am Zweete géint Austria Wien spillen an Hesper géint d'Finne vum FC Honka oder Runavik vun de Färöer Inselen.

An der Champions-League-Qualifikatioun trëfft d'Fola Esch op Lincoln Red Imps aus Gibraltar.