Fir Russland a Wales ass et déi éischte Victoire bei der paneuropäescher Futtball-Europameeschterschaft.

E Mëttwoch war et den Optakt vum 2. Spilldag bei der Futtball-EM.

Den EM-Journal vum Guy Seyler

Grupp B

Finnland - Russland 0:1

Fir Russland gouf et e Mëttwoch déi éischte Victoire bei der EM. Véier Deeg no der 0:3-Defaite géint d'Belsch huet d'Sbornaja Finnland mat 1:0 geklappt, dobäi louch de Ball no net emol 180 Sekonnen schonn am Gol vun de Russen. De Gol vum Pohjanpalo an der drëtter Minutt huet awer net gezielt, well de Finn am Abseits stoung. Den decisive Gol huet de Miranchuk an der Nospillzäit vun der éischter Hallschent markéiert. De Russ huet de Ball aus 10 Meter schéin an de Wénkel gesat. Um Enn geet d'Victoire fir Russland an d'Rei. Si haten déi besser Chancen an hunn de Match déi 90 Minutten iwwer bestëmmt. Finnland dogéint gouf nëmme seele geféierlech.

Grupp A

Tierkei - Wales 0:2

Wales huet duerch eng Victoire géint d'Tierkei e Schratt a Richtung Aachtelsfinalle gemaach. Fir d'Tierkei sinn déi kaum nach ze erreechen. Kuerz virun der Paus huet de Ramsey Wales a Féierung geschoss. An der 61. Minutt hat de Bale d'Chance, per Eelefmeter ze erhéijen, ma hie krut de Ball net an de Filet gesat. An der 5. Minutt vun der Nospillzäit huet dunn de Roberts fir d'2:0-Schlussresultat gesuergt.

Italien - Schwäiz 3:0

No engem net gezielte Gol fir d'Italiener (wéinst Handspill) an der 20. Minutt, sollt et dann awer an der 26. Minutt  de Locatelli sinn, deen de Ball ouni Problemer an de Schwäizer Gol setzt. Bis d'Enn vun der 1. Hallschent, waren d'Italiener kloer déi méi staark Ekipp. No der Paus ass et dunn weider mat enger staarker Leeschtung vun Italien weider gaangen, och wann d'Schwäizer am Ufank e wéineg Drock gemaach hunn. An der 52. Minutt dunn awer hunn d'Italiener op 2:0 erhéicht, dat nees duerch e Gol aus der Distanz vum Locatelli. An der 89. Minutt da mécht den Immobile alles kloer, sou dass Italien mat 3:0 kloer an der Aachtelsfinall vun der EM steet.

News, Statistiken, Radio-Reportagen, Pronostickespill, Quiz, ...