No 90 Minutten ass de Match tëscht de béiden Ekippen aus Groussbritannien mat engem 0:0 op en Enn gaangen.

E Freideg rullt bei der Futtball-EM de Ball an de Gruppen D an E.

Am éischte Match vum Dag konnt sech Schweden mat 1:0 géint d'Slowakei behaapten. Duerno gouf et een 1:1-Remis tëscht Kroatien an Tschechien. Am leschte Match vum Dag gouf et dann nach en 0:0 tëscht England a Schottland.

Den EM-Journal vum Rich Simon

Grupp E

Schweden - Slowakei 1:0

Nom Remis am éischte Match konnt sech Schweden e Freideg iwwert eng 1:0-Victoire géint d'Slowakei freeën an däerf domadder weider vun den Aachtelsfinallen dreemen. No enger schwaacher Virstellung am éischten Duerchgang huet Schweden an den zweete 45 Minutte méi investéiert an huet sech doduerch um Enn verdéngt duerch een Eelefmeter vum Forsberg (77') behaapt. Aus dem Spill eraus ass bei béiden Ekippen e Freideg net vill gaangen, vill Kappbäll hunn an der zweeter Hallschent fir geféierlech Chancë gesuergt.

Grupp D

Kroatien - Tschechien 1:1

Kroatien an Tschechien hu sech e Freideg mat engem 1:1 getrennt. D'Gäscht waren duerch een Eelefmeter vum Schick an der 37. Minutt a Féierung gaangen. Direkt no der Paus huet de Perisic den Ausgläich fir d'Kroate geschoss. Déi favoriséiert Haushären hunn et duerno net fäerdeg bruecht, fir nach e weidere Gol ze schéissen. No enger Néierlag an engem Remis dierften d'Kroate bis ewell net zefridde si mat hirer Leeschtung. Tscheche kënne sech dogéint freeën. Si hu scho véier Punkten um Kont.

England - Schottland 0:0

An der drëtter Partie vum Owend gouf et am Match tëscht England a Schottland en 0:0. D'Three Lions hu gutt ugefaangen a konnte sech fréi déi eng oder aner Chance erausspillen. No enger Zäit haten d'Schotten dann awer den Dréi raus, sou dass virum Gol net méi all ze vill lass war. Ouni Goler ass eng onspektakulär Hallschent dann no 45 Minutten op en Enn gaangen. Och nom Säitewiessel huet ee gemierkt, dass Schottland sech de Punkt séchere wollt an domat zefridde war. England huet offensiv keng Léisunge fonnt a sou trenne sech béid Ekippen aus Groussbritannien um Enn mat engem 0:0-Remis.

News, Statistiken, Radio-Reportagen, Pronostickespill, Quiz, ...