Am Grupp F ka sech Däitschland mat 4:2 géint Portugal duerchsetzen a Frankräich deelt en 1:1 mat Ungarn.

Am éischte Match vum Dag hat sech Frankräich schwéier géint Ungarn gedoen a koum net iwwert en 1:1 eraus. Den zweete Match war ganz animéiert an deem konnt sech Däitschland mat 4:2 géint den aktuellen Europameeschter aus Portugal duerchsetzen. Am Grupp F ass domadder nach alles op. Am Grupp E spillt Spuenien am zweete Match just 1:1 géint Polen an hu soumat just 2 Punkten no 2 Matcher.

Grupp E

Spanien - Polen 1:1
1:0 Morata (25.'), 1:1 Lewandowski (54.')

Spuenien huet de Match an der éischter Hallschent mee och Polen hat gutt Chancen op e Gol. An der 25. Minutt hat Spuenien eng kéier eng Lück an der Defense fonnt an de Morata konnt de verdéngten 1:0 markéieren. Déi bescht Chance op den Ausgläich haten de Swiderski an de Lewandowski. Aus 20 Meter huet de Swiderski als éischt op de Potto geschoss, dono koum de Ball bei de Lewandowski mee den Unai Simon konnt de Schoss paréieren. Och no der Paus huet Polen nach matgespillt an de Lewandowski konnt den 1:1 markéieren. An der 59. Minutt krut Spuenien en Eelefmeter mee de Gerard huet just op de Potto geschoss. Dono hate béid Ekippen gutt Chancen op e Gol mee kengem sollt et geléngen de Ball an de Filet ze schéissen. Soumat ka Spuenien och am zweete Match net gewannen an huet just 2 Punkten no 2 Matcher.

Grupp F

Ungarn - Frankräich 1:1
1:0 Fiola (45.+2.'), 1:1 Griezmann (66.')

An der éischter Hallschent war Frankräich déi besser Ekipp mee huet sëllege Chance leie gelooss. Kuerz virun der Paus dann de Schock vir Frankräich. Mat der éischter richteger Chance konnt Ungarn duerch de Fiola a Féierung goen. No der Paus hunn d'Fransouse sech schwéier gedoen géint kampfstaark Ungaren. An der 66. Minutt konnten d'Franzousen dann awer no engem schnelle Géigestouss duerch de Griezmann ausgläichen. Dono huet Frankräich dominéiert mee Ungarn huet gekämpft an huet kee Gol méi zougelooss. Soumat geet de Match mat 1:1 op en Enn an dat huet sech Ungarn duerchaus verdéngt.

Portugal - Däitschland 2:4
1:0 Ronaldo (15.'), 1:1 Ruben Dias (35.', Eegegol), 1:2 Guerreiro (39.' Eegegol), 1:3 Havertz (51.'), 1:4 Gosens (60.'), 2:4 Diogo Jota (67.')

Däitschland ass gutt an de Match gestart mee no engem Corner vun Däitschland huet Portugal e Konter gestart an de Ronaldo konnt dësen an der 15. Minutt an e Gol ëmwandelen. Däitschland ass awer déi besser Ekipp bliwwen a konnten de Match innerhalb vu 4 Minutten dréinen an dat duerch 2 Eegegoler vum Ruben Dias an dem Guerreiro. No der Paus huet Däitschland vill Spillfreed verspreet. An der 51. Minutt huet den Havertz den 3:1 geschoss. Nëmmen 9 Minutte méi spéit huet de Gosens no engem schéine Spillzuch op 4:1 erhéicht. Dono ass Portugal awer nees bësse méi staark ginn an hinnen ass et gelongen an der 67. Minutt op 2:4 duerch de Jota ze verkierzen. Fir méi sollt et fir Portugal awer net méi duergoen.

News, Statistiken, Radio-Reportagen, Pronostickespill, Quiz, ...