De Münchner Futtball-Stadion duerf beim EM-Match vun Däitschland géint Ungarn e Mëttwoch net mat de Faarwe vum Reebou-Fändel beliicht ginn.

Symbol géint Homophobie bei der EM - Rep. Nadine Kremer

D'Allianz Arena zu München dierf e Mëttwoch beim Match Däitschland géint Ungarn net a Reebou-Faarwe liichten. Dat huet d'europäesche Fussball Federatioun UEFA en Dënschdeg ugekënnegt.

De Plang war et, mat dëser Aktioun een Zeeche géint Homophobie ze setzen. Ungarn hat jo d'lescht Woch e staark kritiséiert Gesetz gestëmmt, dat d'Informatiounsrechter iwwer Homosexualitéit a Geschlechtsëmwandlunge fir Mannerjäreger verbitt.

D'Iddi koum u sech vum Münchener Stadtrat. De Stadion an de Reeboufaarwe sollt en Zeeche si fir Villfalt, Diversitéit an Toleranz. Och d'Bundesregierung hat sech dofir staark gemaach.

De Manuel Neuer, Kapitän vun der däitscher Nationalekipp, hat scho bei der leschter Partie géint Portugal e faarwegt Kapitänsbännchen un, fir en Zeeche géint Haass an Ausgrenzung ze setzen. D'UEFA hat doropshi mat Sanktioune gedreet, se awer net ëmgesat. Den Neuer dierf dëst Bännchen och am Match géint Ungarn undoen. Säin Teamkolleg Leon Goretzka ënnerstëtzt d'Handlung vu sengem Kapitän : "Insgesamt als Fussballwelt kann man aktuell sehr gut erkennen, dass wir Rassismus und Homophobie eigentlich mit Vielfalt entgegentreten wollen. Und ich bin einfach froh darüber und bin froh für jedes Zeichen, das gesetzt wird."

Déi ungaresch Regierung huet kritesch reagéiert a seet et wier geféierlech Politik a Sport ze vermëschen.

D'UEFA huet d'Ufro de Stadion a Reeboufaarwe liichten ze loossen elo refuséiert mam Argument, dass se eng politesch a reliéis neutral Organisatioun wier. Donieft wéilt een en eenheetlecht Stadionsbild bäibehalen. Virgesinn ass, dass déi eelef Stadien, wou gespillt gëtt, just an de Faarwe vun de nationale Fussball Federatiounen oder vun der UEFA liichten.

Verschidde Veräiner aus der däitscher Bundesliga, wéi Frankfurt a Köln, hunn elo annoncéiert, si wiere vun dëser Aschränkung net betraff a wéilten e Mëttwoch– amplaz vu München - hir Stadien an de Reebou Faarwe liichte loossen.

Den däitsche RTL-Reporter Timo Latsch begréisst den aktuellen Aktionismus vun der däitscher Nationalekipp: "Ich finde das ein starkes Zeichen, denn das Thema Homosexualität ist im Profifussball nach wie vor ein sehr Schwieriges. Es gibt bei dieser Europameisterschaft keinen einzigen offen schwul lebenden Fussballer und übrigens auch nicht in der 1., 2., und 3. Liga und das nicht nur in Deutschland, sondern europaweit."

D'UEFA huet elo d'Propose gemaach, d'Münchener Allianz Arena den 28. Juni fir de Christopher Street Liberation Day oder tëscht dem 3. a 9. Juli fir d'Christopher Street Day-Woch zu München an de Reeboufaarwe liichten ze loossen.

News, Statistiken, Radio-Reportagen, Pronostickespill, Quiz, ...