D'Spuenier gewanne kloer géint d'Slowakei, Schwede gewënnt géint Polen. Däitschland kënnt mat Ach und Krach an d'Aachtelsfinallen.

Resumé Futtball-EM / Reportage Gilles Tricca

Grupp E

Slowakei - Spuenien 0:5

Obwuel Spuenien en Eelefmeter verschoss huet, ass d'Ekipp an der éischter Hallschent awer net aus dem Konzept geroden. No engem Selbstgol vum slowakesche Goalkeeper Dubravka sinn d'Spuenier verdéngt a Féierung gaangen. An der Nospillzäit huet dunn de Laporte mat engem prezis placéierte Kappball fir den 2:0 gesuergt. No der Paus ass et dunn nach méi kloer Richtung Victoire vu Spuenien gaangen. Ganzer 3 Mol hunn d'Spuenier nach getraff an der Slowakei keng Chance méi gelooss. Um Schluss gewënnt Spuenien ganz kloer géint d'Slowaken, déi dann och net weider an d'Aachtelsfinalle kommen.

Schweden - Polen 3:2

Polen war iwwert déi 1. Hallschent vum Match gekuckt déi Ekipp, déi méi Ballbesëtz a méi Golschëss a Corneren hat. Och d'Passspill bei de Pole war kloer besser. Ma Schweden huet awer dofir eng besser Statistik am Zweekampf gehat an virun allem fréi de Gol markéiert. Domadder ass et dann 1:0 fir Schweden an d'Paus gaangen. Anescht awer wéi am Match Slowakei géint Spuenien war et hei bis zum Schluss spannend. Polen huet onbedéngt eng Victoire gebraucht fir weiderzekommen an ass no engem 2:0 direkt no der Paus bis op 2:2 un d'Schweden erukomm. Ma an de leschte Minutten ass Schweden awer dunn nach gelongen, den 3:2 ze markéieren an domadder Polen aus dem Turnéier ze geheien.

Grupp F

Portugal - Frankräich 2:2

An der éischter Hallschent hunn d'Portugise kloer méi frësch a méi séier gewierkt. Ënnert anerem goufen et 7 zu 4 Golschëss an d'Portugisen hunn och 60% vun hiren Zweekämpf gewonnen. Den éischte Gol vun de Portugise koum dunn no engem Eelefmeter vum Christiano Ronaldo, dat no engem klore Foul vum Lloris. De Fransousen ass dono net vill agefall, fir auszegläichen, bis dunn den nächsten Eelefmeter gepaff gouf, dës Kéier zu Gonschte vu Frankräich. De Benzema huet fir seng Ekipp doropshin den 1:1 markéiert. Sou ass et dann och an d'Paus gaangen. No der Paus da konnte béid Ekippen nach eemol e Gol markéieren, ma dono ass net méi vill geschitt, sou dass et mat engem 2:2 op en Enn gaangen ass.

Däitschland - Ungarn 2:2
Relativ fréi an iwwerraschend krut de Favorit Däitschland de Géigegol geschoss, dat no enger schéiner Flank an engem Kappball vum Adam Szalai. Dono huet Däitschland däitlech méi Drock gemaach an huet och gutt Chancen erausgespillt, ma zu engem Gol war et an den éischte 45 Minutten net komm fir Däitschland. Komplett verréckt goung et dunn an der 2. Hallschent weider. Bis déi 65. Minutt ass et Däitschland net gelongen, e Gol ze schéissen, bis et dann dunn dach iergendwéi zum 1:1 Ausgläich koum. Ma d'Gléck fir Däitschland huet genee eng Minutt gedauert, well dunn huet Ungarn nees op 2:1 erhéicht, dat 15 Sekonnen nodeem nees ugepaff gouf. Laang huet et dono gedauert, bis Däitschland dunn de fir si wichtegen Ausgläich fäerdeg bruecht huet.

Domadder si Frankräich an Däitschland sécher weider, an och Portugal qualifizéiert sech nach fir d'Aachtelsfinallen.

News, Statistiken, Radio-Reportagen, Pronostickespill, Quiz, ...