De Lëtzebuerger Bouschéisser Jeff Henckels ass op den Olympesche Summerspiller zu Tokio dobäi.

Lëtzebuerg krut am Bouschéissen nämlech eng Quoteplaz, nodeems eng aner Natioun hir net genotzt huet.

De Jeff Henckels ass den Ament Nummer 33 an der Weltranglëscht an et ass seng drëtt Participatioun bei Olympia.

An de leschte Woche war et bei de Qualifikatiounstournoie jo ëmmer ëm eng Plaz oder ee Rang esou just net duergaangen . An dach hunn déi gutt Resultater op deenen Tournoien dem Jeff Henckels elo an d'Kaarte gespillt. Virun allem hunn déi Sportler aus mäi exotesche Länner, déi an enger éischter Phas eng Quoteplaz kruten, och e Minimum vu 640 Réng misse schéissen:

An Ozeanien hat Fidschi eng Plaz, déi hunn awer e Samschdeg matgedeelt, datt se kee schécken. An ech war deen Éischten an der Weltranglëscht, deen elo nach keng Plaz hat an dofir hunn ech se kritt.

D'Freed beim Jeff Henckels ass elo natierlech grouss, och wann hien duerch déi lescht Wochen e bësse méi virsiichteg war, bis déi offiziell Confirmatioun do war:

Et war gedeelt, mat all deem am Joer, wou et schonn dacks esou just net duergaangen ass, ech wousst et schonn inoffiziell, mä ech hunn geduecht, net dat si sech nees geiert hunn. D'Freed war dunn haut natierlech grouss wei et offiziell war.

Déi dach nach onerwaarte Qualifikatioun mécht d'Preparatioun fir de Bouschéisser elo e bësse sportlech:

Well dës Woch schaffen ech nach ganz normal an da ginn ech owes op den Training, wéi elo all déi lescht Joren. D'Nächst Woch hunn ech dann e puer Deeg, et sinn effektiv just e puer Deeg, wou ech mech da ka preparéieren.

No Athen 2004 an London 2012 gëtt Tokio 2021 dem 36 Joer ale Jeff Henckels seng drëtt Olympesch Summerspiller.