Den CSL-Mëttelstreckler ass en Dënschden den Owend bei engem Meeting zu Luzern mat enger Zäit vun 3:38:62 den 2. op den 1.500 Meter ginn.

De Charel Grethen huet d’A-Norm (3:35:00) an de leschte Méint wuel knapp verpasst, mee wäert mat grousser Warscheinlechkeet iwwert de Weltranglëschte-System noréckelen. Déi offiziell Lëscht vun de qualifizéierten Athlete gëtt den 1. Juli vun der IAAF publizéiert. No den 800 Meter zu Rio ass et dem Charel Grethen seng zweet Participatioun bei olympesche Summerspiller.

Charel Grethen an Olympia / Reportage Rich Simon

2016 bei den Olympesche Spiller zu Rio a Brasilien ass de Charel Grethen nach iwwer 800 Meter am Asaz gewiescht. A senger Serie koum hien deemools op déi 5. Plaz. Datt ass net duergaangen, fir weider ze kommen.

Dat Joer drop huet hien decidéiert, fir vun den 800 op d'1500 Meter ze wiesselen. 2019 gouf et dunn ee Réckschlag mat enger schwéierer Blessure un der Achillesseen. Réischt dat leschte Joer ass hien dunn nees seng éischte Course gelaf. Fir sech iwwer den direkte Wee fir d'Olympesch Spiller zu Tokio ze qualifizéieren, hätt de Mëttelstreckeleefer missen ee Chrono vun 3 Minutten a 35 Sekonnen lafen. Dat ass him bis elo net gegléckt. Hie war awer dës Woch an der Schwäiz nees no drun.

Zu Luzern sinn ech meng leschte Course an der Olympia-Qualifikatioun gelaf. Mat der zweeter Plaz war ech ganz zefridden. Domadder hunn ech meng Form confirméiert. An ech konnt nach Punkten am World-Ranking gutt maachen.

An deem World-Ranking ass hien den Ament op der 37. Plaz. An déi Plaz geet am Prinzip duer, fir a Japan mat dobäi ze sinn. Dat ass a sech déi selwecht Situatioun fir de Charel Grethen wéi schonns viru 5 Joer.

Och fir Rio gouf ech réischt am leschte Moment gewuer, wéi et weider geet. Domadder hunn ech awer kee Problem. Lo geet et weider mam Training an ech kucken, fir meng Form esou gutt wéi méiglech auszebauen.

De Charel ass jiddwerfalls voll op Tokio fokusséiert.

An de leschte Courssen hunn ech ëmmer gewisen, datt ech konstant Zäite lafen. Dat heescht d'Form stëmmt. Lo geet et weider an Trainingslager, wou ech nach méi u menger Form ka schaffen. Dat misst da klappe fir déi nächste Courssen.

Nieft dem Charel Grethen hunn och nach de Lyndon Sosa am Trappschéissen an d'Schwëmmerin Julie Meynen gutt Chancen, fir zu Tokio mat dobäi ze sinn.