En Dënschdeg den Owend gouf am Victoria Stadium a Gibraltar de Retourmatch vun der CL-Quali tëscht der Escher Fola an de Lincoln Red Imps gespillt.

Am Allersmatch koum een um Escher Gaalgebierg net iwwer en 2:2 eraus, deemno war de Lëtzebuerger Champion en Dënschdeg den Owend gefuerdert.

Ma wéi schonns am Allersmatch ass d'Fola net gutt an de Match komm an no 19 Minutten ass d'Lokalekipp dunn och a Féierung gaangen, dat duerch ee Gol vum Tjay de Barr.

An och de Rescht vun der éischter Hallschent ass net besser gelaf. An der 39. Minutt konnt de Liam Walker nämlech per Eelefmeter op 2:0 erhéijen. Den Thomas Hym am Escher Gol hat virdrun den de Barr gefoult.

An der 58. Minutt ass dunn awer déi definitiv Decisioun gefall. Do konnt de Kian Ronan nämlech den 3:0 markéieren.

D'Haushären haten elo richteg Loscht ze spillen an an der 65. Minutt gouf de Rosa du vun Thomas Hym am Strofraum gefoult. Zweeten Eelefmeter fir d'Red Imps, zweet giel Kaart fir den Hym, deen domat fréizäiteg huet dierfen dusche goen. De Liam Walker huet den uschléissenden Eelefmeter dann och erageschoss an esou op 4:0 gestallt.

Den Tjay de Barr huet an der 73. Minutt du fir d'5:0-Schlussresultat gesuergt. Domat ass d'Escher Fola dann och eliminéiert.

De Sportdirekter vun deenen Escher, de Pascal Welter, ass sech bewosst, datt dat keng Reklamm fir de Lëtzebuerger Futtball war.

De Pascal Welter

"Et ass eng Blamage, wann een als Lëtzebuerger géint Gibraltar 5:0 verléiert. Et war sécherlech méi einfach fir nozekucke wéi um Terrain ze stoen. Et war ganz vill Loft. Mee dat zielt fir déi zwou Ekippen. No der Warnung, déi mir am Heemmatch kruten, wousste mir genau, wéi si géife spillen. Mir hunn als Ekipp verluer. Keen huet op sengem Niveau gespillt. Si kruten hir Konter quasi allkéiers duerch. Et ass eng riseg Enttäuschung a mir hu Lëtzebuerg net gutt vertrueden. Mir mussen eis elo déi richteg Froe stellen. Et ass inacceptabel, wat mir ofgeliwwert hunn."

Sebastien Thill mat Sheriff Tiraspol weider

Besser gemaach wéi d’Fola huet et dogéint Sheriff Tiraspol. De Champion aus Moldawien huet den albaneschen Champion Teuta eliminéiert. Den Assist zum decisiven 1:0 koum vum Lëtzebuerger Nationalspiller Sebastien Thill.