Hesper ass am Retourmatch een 1:1 géint Domzale net duergaangen a fir de Racing gouf et eng weider Néierlag géint Breidablik.

An der Qualifikatioun fir d'Conference League waren en Donneschdeg den Owend zwee Lëtzebuerger Veräiner am Asaz. Fir de Racing an Hesper ass no der éischter Ronn vun der Qualifikatioun schonn nees Schluss.

De Swift Hesper huet am Stade Josy Barthel 1:1 géint Domzale aus Slowenien gläichgespillt. Duerch d'0:1-Néierlag aus dem Allersmatch ass een domadder eliminéiert. De Sene hat de Swift an der 31. Minutt a Féierung bruecht. An der 60. Minutt konnt de Kait fir d'Gäscht ausgläichen.

Fir de Racing war et en Donneschdeg den Owend och den Out. D'Ekipp vum Jeff Saibene ass an Island géint Breidablik net iwwert een 0:2 erauskomm. Och den Allersmatch hat ee verluer an dat mat 2:3 virun den eegene Spectateuren.

De Racing war vun der 69. Minutt un an Ënnerzuel. Den Dwayn Holter war mat Rout vum Terrain gesat ginn.

Conference League / Gilles Tricca