Da gouf et nach fir de Marvin Martins mat Austria Wien e Gläichspill géint Breidablik aus Island.

Um Donneschdeg stoungen d'Allersmatcher vun der 2. Ronn an der Qualifikatioun fir d'Europa Conference League um Programm, am Asaz war Diddeleng doheem an d'Fola an Ungarn. D'Retourmatcher ginn an enger Woch gespillt.

De Resumé vun de Matcher vum Gilles Tricca

F91 Diddeleng - Bohemians 0:1

E fréie Gol vun de Gäscht aus Irland huet d'Pläng vun den Diddelenger op d'Kopp gehäit. Well schonn no 11 Minutte ware si no engem Gol vum Tierney a Réckstand geroden. An der éischter Hallschent koum weider net vill Zielbares dobäi eraus, ausser giel Kaarte fir d'Diddelenger Delgado a Kirch. Vill Wiesselen a vill giel Kaarte gouf et an der zweeter Hallschent bei béiden Ekippen, ma e Gol sollt awer net méi falen. Esou verléieren déi Diddelenger knapp doheem géint d'Ekipp aus Irland an hunn awer an enger Woch nach d'Méiglechkeet, fir sech fir déi nächst Ronn ze qualifizéieren.

Shakhtyor Soligorsk - Fola Esch 1:2

D'Fola huet et an Ungarn géint Shakhtyor Soligorsk aus Belarus dogéint besser gemaach. No 19 Minutten huet den Omosanya d'Ekipp aus dem Süde vu Lëtzebuerg a Féierung bruecht an den Mustafic huet no 44 Minutten nach e Gol dropgesat. Béid Kéieren hat de Klein d'Virlag ginn. Mat deem Score goung et dann och an d'Paus. No ronn 67 Minutten huet de Stasevich nees fir Spannung gesuergt an huet op 1:2 aus der Siicht vun der Heemekipp verkierzt. Et sollt awer bei dësem Gol bleiwen, esou datt d'Fola sech géint Soligorsk duerchsetze kann an eng gutt Ausgangspositioun fir de Réckmatch den nächsten Donneschdeg huet.

Austria Wien - Breidablik 1:1

Bei de Wiener stoung de Lëtzebuerger Nationalspiller Marvin Martins an der Startopstellung. D'Éisträicher ware géint d'Ekipp aus Island, déi jo de Racing an der viregter Ronn eliminéiert haten, an der 32. Minutt duerch den Djuricin a Féierung gaangen, ma kuerz no der Paus huet de Sigurdarson seng Faarwen nees erubruecht. Bei deem Resultat sollt et och bleiwen, de Lëtzebuerger Nationalspiller stoung déi 90 Minutten iwwer um Terrain.

KuPS - Worskla Poltawa 2:2

Och fir de Lëtzebuerger Nationalspiller Olivier Thill gouf et en Donneschdeg den Owend just e Remis. Um Enn huet d'Ekipp aus der Ukrain nämlech 2:2 mat KuPS aus Finnland gedeelt. Den Olivier Thill stoung 90 Minutten iwwer um Terrain an hat den tëschenzäitlechen 2:1 vum Eelefmeterpunkt aus geschoss. KuPS hat den 2:2 an der 96. Minutt geschoss.