E Freideg de Moien eiser Zäit war de Jeff Henckels deen éischte Lëtzebuerger, dee bei den Olympesche Spiller am Asaz war.

Mat 646 Réng koum de Jeff Henckels an der "Ranking Round" op déi 55. Plaz ënner 64 Konkurrenten. Dem Bouschéisser säin nationale Rekord läit bei 682 Punkten, dëst wier duergaange fir déi zweete Plaz.

An den Eliminatoiren en Donneschdeg kritt de 36 Joer alen Henckels et elo mam Mete Gazoz ze dinn. Dat 22 Joer aalt Talent aus der Tierkei gouf e Freideg den 10. an der Qualifikatioun mat 669 Réng.

Tokio2020 Jeff Henckels/Reportage Franky Hippert

No Athen 2004 a London 2012 ass de Jeff Henckels elo bei sengen drëtten Olympesche Summerspiller. Och viru 17 Joer hat sech de Bouschéisser scho mat de Wiederkonditiounen an der griichescher Haaptstad schwéier gedoen. E Freideg zu Tokio war et net vill anescht wéi deemools. De Wand huet déi ganzen Zäit gedréit, riets-lénks.

Virun allem an der Mëtt vum Kompetitiounsfeld mat de 64 Konkurrenten, do wou de Jeff Henckels stoung, war vill méi Loft wéi op de Säiten. Den Zweete vun den Olympesche Spiller zu Rio stoung direkt nieft dem Henckels an huet nach manner geschoss wéi de Lëtzebuerger. An dach weess den Tireur vum Stroossener Club Guillaume Tell, datt méi an der Qualifikatioun dra war.

"Ech hätt missen 10 Punkte méi schéissen, da wär ech elo tëscht 30 a 40."

De Jeff Henckels huet e Freideg 646 Réng geschoss. Säi Lëtzebuerger Rekord steet bei 682. Dat hätt e Freideg esouguer eng zweete Plaz bedeit. En Donneschdeg kritt de Cosl-Athlet et mam Mete Gazos ze dinn. Dat 22 Joer aalt Talent aus der Tierkei gouf e Freideg 10. an der Qualifikatioun mat 669 Réng. Et ass net onbedéngt dem Henckels säi léifste Géigner.

"Ech hätt mer hien net erausgesicht. Hien huet den Europarekord. Ech hunn awer viru 6 Méint géint hien gewonnen. Hien ass bestëmmt op Revanche aus."

Datt keng Spectateuren dobäi waren, huet sech bei der Qualifikatioun elo net esou bemierkbar gemaach an dach wär him de Wapp, wéi d'Kompetitioun bis ugefaangen huet, de Wapp 1 zu 100 gaangen, esou den 3-fachen Olympionik Jeff Henckels.

Reaktioun vum Jeff Henckels
De Lëtzebuerger Bouschéisser ass net honnertprozenteg zefridde mat senger Leeschtung um Freideg.