Um Méindeg war et och den Optakt an der ukrainescher Premier Ligue, mat engem 2-2 tëscht der Ekipp vum Oli Thill, Worskla Poltawa, an Dnipro-1.

Gelongen Optakt an déi nei Saison fir Royale Union St. Gilloise an der 1. Liga an der Belsch. Den Opsteiger huet mat 3:1 beim RSC Anderlecht gewonnen. Den Anthony Moris stoung bei de Gäscht tëscht de Pottoen.

An der 2. Bundesliga an Däitschland ass e Sonndeg och Erzgebirge Aue an déi nei Saison gestart. Beim 1. FC Nürnberg gouf et no 90 Minutten een 0:0-Remis. Den Dirk Carlson, dee sech wärend dem Match um Kapp blesséiert huet, stoung bei Aue an der Startformatioun an huet de Match duerchgespillt. Den Tim Kips war net am Kader.

Austria Wien mam Marvin Martins ass mat enger Néierlag an déi nei Saison am éisträichesche Championnat gestart. Beim SV Ried huet ee mat 1:2 de Kierzere gezunn. De Lëtzebuerger Nationalspiller gouf an der 63. Minutt ausgewiesselt.

Eng ganz kloer 5:0-Victoire gouf et fir New York City doheem géint Orlando City an der MLS. De Lëtzebuerger Maxime Chanot stoung déi 90 Minutten iwwer um Terrain.

Samschdeg

E verréckte Match war et e Samschdeg fir de schwäizer Champion Young Boys Bern um 1. Spilldag vun der neier Saison. Christopher Martins a Co hu sech um Enn mat 4:3 zu Luzern behaapt. Bern war mat 1:0 a Féierung gaangen. Duerno huet d'Lokalekipp de Match gedréint an konnt sech mat 3:1 ofsetzen. De Young Boys ass et an de leschten 30 Minutten allerdéngs gelongen, fir de Match nach emol ze dréinen. Den decisive Gol fir d'Gäscht ass eréischt Sekonne viru Schluss gefall. De Martins gouf an der 58. Minutt agewiesselt.

E gelongen Optakt an déi nei Saison an der 3. Liga gouf et e Samschdeg och fir Saarbrécken an de Maurice Deville. Auswäerts konnt ee sech mat 1:0 géint den TSV Havelse duerchsetzen. Den decisive Gol huet de Gouras an der 19. Minutt geschoss. De Maurice Deville stoung vun Ufank un um Terrain a gouf an der 73. Minutt ausgewiesselt.

Freideg

Um éischte Spilldag am ukrainesche Championnat hu sech PFK Lviv a Mariupol mat engem 1:1-Remis getrennt. Den Nationalspiller Enes Mahmutovic souz bei Lviv laang op der Bänk a gouf eréischt an der 82. Minutt agewiesselt.