Duerch säi Gol zur 1:0-Féierung huet et laang gutt ausgesi fir Poltawa, no 120 Minutte stoung awer eng 2:3-Defaite géint de PS Kuopion.

Donneschdeg

An der Qualifikatioun fir d'Conference League gouf et en Donneschdeg den Owend fir Worskla Poltawa mam Olivier Thill eng batter 2:3-Defaite géint de PS Kuopion aus Finnland. Nom 2:2 am Allersmatch war Poltawa am Retourmatch duerch e Gol vum Olivier Thill an der 48. Minutt a Féierung gaangen, ma nom Ausgläich vum finnesche Géigner zum 2:2 an der leschter Sekonn ass d'Decisioun an der Verlängerung gefall. Do hat dann um Enn de PS Kuopion d'Nues vir a konnt sech duerch e Gol an der 111. Minutt d'Victoire an domat och den Ticket fir déi drëtt Qualifikatiounsronn sécheren.

Fir Austria Wien gouf et iwwerdeems eng enttäuschend 1:2-Defaite géint Breidablik aus Island. Nodeems ee sech am Allersmatch mat engem 1:1 getrennt hat, gouf et géint de fréiere Géigner vum RFCUL am Retourmatch näischt ze huelen. De Marvin Martins stoung dobäi iwwerraschend net am Kader vun de Wiener. Breidablik spillt an der nächster Ronn vun der Conference-League-Qualifikatioun géint den FC Aberdeen aus Schottland.

Mëttwoch

Bei der Partie Sheriff Tiraspol mam Sébastien Thill huet de Géigner Alashkert Martuni no knapp 10 Minutte schonn Drock gemaach mat engem 1:0 duerch den Aleksandar Glisic. Ma duerno hat Sheriff Tiraspol eendeiteg déi besser Chancen. Den Ausgläich koum an der 15. Minutt, ma d'Flank 2 Minutte méi spéit vum Sébastien Thill koum net un. De Golkipp konnt de Ball halen. Mam 2:1 (24') fir Sheriff Tiraspol goung et an d'Paus.

Um Enn vun der zweeter Hallschent krut Tiraspol dunn een Eelefmeter no engem Foul vun engem Géigespiller. An deen Eelefmeter konnt de Sébastien Thill ouni gréisser Problemer am Goal placéieren, gouf awer kuerz dono, an der 90. Minutt, ausgewiesselt. No 6 Minutten Nospillzäit huet den FC Sheriff Tiraspol et mat engem 3:1 an déi drëtt Ronn vun der Qualifikatioun gepackt. Do trëfft Sheriff déi nächste Woch op Roter Stern Belgrad. De Retourmatch ass dann den 10. oder 11. August.

Weider ass och Young Boys Bern mam Christopher Martins, deen an der 70. Minutt agewiesselt gouf. Duerch den Allersmatch goung et ouni Goler géint Slovan Bratislava an de Retourmatch vun der 2. Qualifikatiounsronn. An och an dëser Partie gouf sech näischt geschenkt. No engem Handspill gouf et Eelefmeter fir d'Young Boys an och den 1:0 (10'). Mam 2:0 an der 24. Minutt duerch den Ulisses Garcia goung et an d'Paus.

An der zweeter Hallschent dann no 4 Minutten den 3:0 duerch e Fräistouss vum Michel Aebischer. No engem Selbstgol vum Kanga (60') dann den 3:1, den 3:2 gouf et 2 Minutte méi spéit duerch den Ezekiel Henty. Fir d'Schwäizer geet et dann elo an der drëtter Ronn vun der Qualifikatioun déi nächst zwou Woche géint Cluj. Sollte béid Lëtzebuerger hat hire Veräiner déi Ronn iwwerstoen, sti si an de Playoffs vun der Champions League.