Et ass deen éischte Gol an der Ligue 1 vun engem Lëtzebuerger zanter 1996.

An der Ligue 1 stoung de Gerson Rodrigues e Sonndeg déi éischte Kéier fir säin neie Veräin Troyes um Terrain. Um Enn gouf et eng 2:0-Victoire zu Metz. De Lëtzebuerger Nationalspiller huet an der 50. Minutt den 1:0 markéiert a gouf an der 66. Minutt ausgewiesselt.

En erfollegräiche Weekend war et dann och fir de Mica Pinto an de Laurent Jans mat Sparta Rotterdam. Déi zwee Lëtzebuerger hu mat hirem Veräin mat 3:1 géint Fortuna Sittard gewonnen. Wärend de Pinto an den éischten Eelef stoung an an der 44. Minutt Giel gesinn huet, ass de Laurent Jans an der 75. Minutt agewiesselt ginn. Fir Rotterdam ass et déi éischte Victoire an dëser Saison.

Den Oli Thill stoung e Sonndeg am ukrainesche Championnat bei Worskla Poltawa vun Ufank un um Terrain. Virun den eegene Spectateuren huet sech d'Ekipp vum Lëtzebuerger mat engem 2:2 vun Desna getrennt. Den Thill huet an der 16. Minutt Giel gesinn. De Vincent Thill ass nach blesséiert a waart doduerch nach op seng Première bei Poltawa.

An der 2. Bundesliga an Däitschland huet Aue géint Düsseldorf mat 0:1 verluer. Den Tabelleleschte waart domadder weider op eng éischt Victoire an dëser Saison. Bei der Lokalekipp huet den Dirk Carlson wärend dem ganze Match gespillt. Den Tim Kips stoung net am Kader.

Souverän Victoire da fir de Sébastien Thill mat Sheriff Tiraspol. Am moldawesche Championnat huet een um 9. Spilldag mat 2:0 géint Petrocub gewonnen. De Lëtzebuerger stoung bis déi 81. Minutt um Terrain. De Favorit op den Titel huet bis ewell véier vu fënnef Matcher gewonnen.

An der Nuecht op e Sonndeg gouf et fir New York City mam Maxime Chanot eng Néierlag an der MLS an den USA. Mat 1:2 huet ee sech beim Leader New England Revolution misse geschloe ginn. De Lëtzebuerger Nationalspiller huet de ganze Match duerchgespillt.

An der 2. Liga a Portugal huet Vilafranquense mam Eric Veiga 1:1 géint Chaves gläichgespillt. De Lëtzebuerger, deen déi 90 Minutte gespillt huet, steet aktuell mat sengem Veräin op der Relegatiounsplaz.

Samschdeg

An der Schwäiz gouf et e Samschdeg den Owend eng kloer Victoire fir d'Young Boys Bern mam Christopher Martins. Virun den eegene Spectateuren huet ee sech mat 4:0 géint de Leader FC Zürich duerchgesat. De Lëtzebuerger Nationalspiller huet den éischte Gol preparéiert a gouf an der 85. Minutt ausgewiesselt.

An der Bundesliga konnt sech de Leandro Barreiro mat Mainz iwwer 3 Punkten zu Hoffenheim freeën. Déi Mainzer hu mat 2:0 gewonnen. De Lëtzebuerger Nationalspiller stoung an der Startopstellung a gouf an der 76. Minutt ausgewiesselt.

An der 3. Liga an Däitschland gouf et tëscht Viktoria Köln an dem 1. FC Saarbrécken een 0:0. De Maurice Deville souz bei de Gäscht 90 Minutten op der Bänk.

An der 2. Liga an England huet Huddersfield Town mat 1:2 bei Stoke City de Kierzere gezunn. Bei de Gäscht gouf de Lëtzebuerger Nationalspiller Danel Sinani an der 68. Minutt agewiesselt.

Op Zypern huet Achnas an der 1. Liga mat 1:3 géint Paeek de Kierzere gezunn. Den Tim Hall stoung bei der Lokalekipp déi 90 Minutten iwwer um Terrain. Fir Achnas ass et déi zweeten Néierlag am zweete Match an dëser Saison.