An der Ligue 1 a Frankräich huet Metz géint Troyes verluer. Fir d'Gäscht huet de Lëtzebuerger Rodrigues getraff.

Bundesliga

Eintracht Frankfurt - VfB Stuttgart 1:1
1:0 Kostic (79'), 1:1 Marmoush (88')

An der Partie tëscht Frankfurt a Stuttgart huet et laang no engem Match ouni Goler ausgesinn, ma d'Schlussphas déi hat et dunn a sech. No sengem Wiesseltheater hat de Kostic déi Frankfurter an der 79. Minutt a Féierung bruecht. Dëse Gol sollt awer net duergoen, well déi Stuttgarter, déi vun der 82. Minutt un an Ënnerzuel waren, konnten duerch de Marmoush zwou Minutte viru Schluss ausgläichen. Béid Veräiner hu sech du mat engem 1:1-Remis getrennt.

D'Eintracht dierft no zwee Schëss op d'Lat an der zweeter Hallschent mam Remis net zefridde sinn. Si waarden dann och weider op eng éischt Victoire an dëser Saison.

VfL Bochum - Hertha BSC 1:3
0:1 Serdar (37'), 0:2 Serdar (43'), 1:2 Zoller (59'), 1:3 Moalida (78')

Borussia Mönchengladbach - Arminia Bielefeld 3:1
1:0 Stindl (35'), 1:1 Okugawa (45'+2), 2:1 Stindl (69'), 3:1 Zakaria (71')

Déi gladbacher Féierung no 35 Minutte sollt net laang halen an awer hunn d'Gäscht aus Bielefeld missten zidderen. Well eréischt de VAR huet de Gol vum Okugawa an der Nopsillzäit vun der 1. Hallschent accordéiert. Nom Säitewiessel sinn der Heemekipp 3 staark Minutten duergaangen, fir nees a Virsprong ze goen an dëse souguer nach auszebauen. Getraff haten de Stindl no 69 Minutten an de Zakaria 3 Minutte méi spéit. Et sollt dann och bei deem Score bleiwen.

Ligue 1

FC Metz - Troyes 0:2
0:1 Rodrigues (50'), 0:2 Chavalerin (84')

Perfekten Optakt fir de Gerson Rodrigues am Trikot vun Troyes. De Lëtzebuerger Nationalspiller huet direkt a sengem éischte Match e Gol markéiert a säi Veräin an der 50. Minutt mat 1:0 a Féierung bruecht. An der 84. Minutt huet de Chavalerin fir d'2:0-Schlussresultat gesuergt.

De Rodrigues gouf an der 66. Minutt ausgewiesselt. No 5 Matcher steet Troyes an der Tabell op der 15. Plaz. Metz ass als 17. nëmmen eng Plaz vun der Relegatioun ewech.

Den detailléierte Resumé vum Match fannt Dir bei de Kolleege vun RTL 5minutes.

D'Resultater vun de Lëtzebuerger Nationalspiller am Ausland fannt Dir hei.

Premier League

Leeds United - Liverpool 0:3
0:1 Salah (20'), 0:2 Fabinho (50'), 0:3 Mané (90+2')

Den FC Liverpool huet e Sonndeg nogezunn an héichverdéngt mat 3:0 zu Leeds gewonnen. Batter fir d'Reds ass allerdéngs déi uerg Blessur vum Elliott.

No enger rasanter Ufanksphas huet de Salah Liverpool an der 20. Minutt mat sengem 100 Premier-League-Gol a Féierung bruecht. D'Ekipp vum Klopp huet duerno weider den Toun uginn a Leeds konnt net wierklech mam Tempo mathalen. D'Suite dorausser war, datt et eng ganz Partie Chancen op en zweete Gol gouf, ma Sané, Elliott a van Dijk kruten de Ball net iwwert d'Linn.

No der Paus huet de Fabinho et besser gemaach an op 2:0 fir Liverpool gesat. D'Resultat ass fir d'Reds duerno awer séier an den Hannergrond geréckelt, well sech den Elliott bei engem Tackling vum Struijk schwéier um Been blesséiert huet. De Mané huet an der Nospillzäit fir d'3:0-Schlussresultat gesuergt.

An der Premier League stinn no 4 Spilldeeg ManUnited, Chelsea a Liverpool mat 10 Punkte gläichop un der Spëtzt.

Serie A

Sampdoria Genua - Inter Mailand 2:2
0:1 Dimarco (18'), 1:1 Yoshida (32'), 1:2 Martinez (44'), 2:2 Augello (47')

Um drëtte Spilldag am italienesche Championnat huet Inter Mailand déi éischt Punkten an dëser Saison leie gelooss. Bei Sampdoria Genua huet ee sech misse mat engem 2:2-Gläichspill zefridde ginn.

AC Mailand - Lazio Roum 2:0
1:0 Leao (45'), 2:0 Ibrahimovic (67')

La Liga

Espanyol Barcelona - Atlético Madrid 1:2
1:0 De Thomas (40'), 1:1 Ferreira Carrasco (79'), 1:2 Lemar (90+9')