D'Lëtzebuergerin huet sech en Dënschdeg den Owend no enger staarker Leeschtung an 2 Sätz géint d'Varvara Gracheva duerchgesat.

Fir d'Mandy Minella ass et beim WTA-Tennistournoi op der Kockelscheier dee 17. Optrëtt. Dëst Joer huet d'Lëtzebuergerin et fir d'éischte Kéier an déi zweet Ronn gepackt. An 2 Sätz huet si sech mat 6:3 a 6:4 géint déi favoriséiert Varvara Gracheva aus Russland behaapt.

D'Mandy Minella steet aktuell an der Weltranglëscht op Plaz 233. Hir Géignerin vun en Dënschdeg ass d'Nummer 77.

An den Aachtelsfinalle kritt d'Mandy Minella et e Mëttwoch mam Alizé Cornet ze dinn. D'Franséisin steet am WTA-Ranking op Plaz 72 an ass beim Tournoi op 8 gesat. D'Partie gëtt fréistens um 15.30 Auer gespillt. Dir kënnt dës nees live op RTL ZWEE an op RTL.lu kucken.

Et ass eng ganz emotional Victoire fir déi 35 Joer al Spillerin vun der Schéiss. 16 Mol war d'Mandy Minella scho beim WTA-Tournoi hei am Land dobäi, nach ni sollt et klappen, fir am Haapttableau en Tour weiderzekommen. Elo ass et deemno eng Premiere bei der Dernière:

Jo et ass onglaublech, et deet einfach gutt, eng Victoire an der Täsch ze hunn heiheem virun eegenem Publikum.

Déi routinéiert Mandy Minella hat e kloren a gudde Plang géint déi 21 Joer jonk Varvara Grachevaan dobäi ass d'Russin an der Weltranglëscht als Nummer 77, ëmmerhin 156 Plaze besser klasséiert wéi d'Lëtzebuergerin.

Ech hat dëse Summer géint hat gespillt. D'Taktik war Slice an der Revère, mat Héicht op de Coup droit, vill Variatioun.

Am Nomëtteg krit d'Mandy Minella et am drëtten Match vum Dag, deen net virun 15.30 Auer ufänkt, mat der Franséisin Alizé Cornet ze dinn:

Jo ech kennen d'Alizé gutt. Mir haten zu Gstaad an der Finall géintenee gespillt an ech hat verluer. Et wäert iwwert d'Physis goen. Ech muss e grousse Match géint hat spillen, fir ze gewannen.

Virun 3 Joer huet d'Mandy Minella zu Gstaad knapp an 2 Sätz verluer. Deen aneren Duell, an deem et eng Defaite gouf, läit schonn 9 Joer zeréck. Mam richtege Plang, ass et awer och sécherlech géint déi aktuell Nummer 72 am WTA-Ranking net onméiglech, ze gewannen.

Minella en Tour weider / Reportage Franky Hippert

D'Resultater am Iwwerbléck

Markéta Vondroušová (CZE) - Alison Van Uytvanck (BEL)  6:2 a 6:3

Lesja Zurenko (UKR) - Aliaksandra Sasnovich (BLR)  5:7 a 6:7

Arianne Hartono (NED) - Anna-Lena Friedsam (GER)  7:6, 3:6 a 7:6

Zarina Diyas (KAZ) - Anna Karolína Schmiedlová (SVK)  6:0, 1:6 a 6:4

Greetje Minnen (BEL) - Nuria Parrizas-Diaz (ESP)  7:6 (7:4), 6:7 (1:7), 7:6 (7:2)

Mandy Minella (LUX) - Varvara Gracheva (RUS)  6:3 a 6:4

Jeļena Ostapenko (LAT) - Jule Niemeier (GER) 6:2 a 6:2