D'BGL BNP Paribas Luxembourg Open sinn am Eenzel fir d'Mandy Minella eriwwer. Bei hirer leschter Participatioun gouf si am 2. Tour eliminéiert.

Out fir d'Minella am Eenzel beim WTA-Tournoi / Rep. F. Hippert

Et war e ganz emotionale Moment e Mëttwoch den Owend kuerz virun 20 Auer. D'Mandy Minella huet an der zweeter Ronn vum WTA-Tournoi op der Kockelscheier zweemol 3:6 géint d'Alizé Cornet aus Frankräich verluer. Et war dee leschten Optrëtt vun der 35 Joer aler Spillerin vun der Schéiss am Eenzel an hirer Karriär beim internationalen Tournoi hei am Land.

En Dënschdeg den Owend war et schonn e flotten Exploit vum Mandy Minella, fir bei hirer 17. Participatioun op der Kockelscheier, eng éischte Kéier iwwerhaapt, an den zweeten Tour vum Haapttableau ze kommen. Besonnesch bei hirem Service beim Spillstand vun 2:5 an zwee Matchbäll géint sech, wousst déi 35 Joer al Minella e Mëttwoch, datt d'Enn ëmmer méi no kéim: Jo et war immens schwéier, d'Emotiounen zeréckzehalen. Et ass awer erauskomm. Ech si mega frou, datt ech dat heiheem nach esou konnt erliewen. An ech soe jidderengem Merci deen hei war.

Wéi een héiert a gesäit hunn och am Interview nach vill Emotioune matgespillt. Viru genee 20 Joer, 2001, hat d'Mandy Minella eng éischte Kéier op der Kockelscheier opgeschloen, dat am Alter vu 15 Joer. Eréischt virun 9 Méint ass d'Spillerin vun der Schéiss eng zweete Kéier Mamm ginn. Et ass kloer, datt et dee Moment physesch op WTA-Niveau schwéier gëtt: Jo bei mir huet et un de Bee gefeelt. De Match vu gëschter [Dënschdeg] huet mer wéi gedoen. Ech hunn déi Konstanz net méi, fir 3-4 Matcher op deem Niveau ze spillen.

E Mëttwoch den Owend ass d'Mandy Minella och am Dubbel eliminéiert ginn. Mat hirer Partnerin Liudmila Samsonova gouf et an der Aachtelsfinall eng Néierlag an 2 Sätz (2:6 a 6:7) géint den Duo Bouzkova / Hradecka.

En Donneschdeg den Owend um 17.30 Auer gëtt d'Mandy Minella vun den Organisateure vum Tournoi nach geéiert.

Nom Tournoi op der Kockelscheier ass der Lëtzebuergerin hir Karriär nach net ganz eriwwer. Et stinn ënnert anerem nach d'Tournoie vun Ostrawa an der Tschechescher Republik an Astana am Kasachstan um Programm.

D'Resultater am Iwwerbléck

Clara Tauson (DEN) - Ekaterina Alexandrova (RUS)  6:4, 3:6 a 7:6 (7:1)

Océane Dodin (FRA) - Liudmila Samsonova (RUS)  6:7 (5:7) a 6:7 (3:7)

Shuai Zhang (CHN) - Marie Bouzková (CZE) 2:6, 7:6 (7:3) an 3:6

Mandy Minella (LUX) - Alizé Cornet (FRA)  3:6 an 3:6

Markéta Vondroušová (CZE) - Jana Fett (CRO)  6.2 a 6:4