Trotz enger 1:0-Féierung huet d'Union Saint-Gilloise um Enn nach mat 1:2 géint Royal Antwerpen de Kierzere gezunn.

Méindeg

Kreta huet e Méindeg am Nomëtteg um 4. Spilldag vum Championnat 1:1 géint Giannina gespillt. De Lëtzebuerger Nationalspiller Vahid Selimovic gouf an der 83. Minutt agewiesselt.

Sonndeg

Duerch eng 1:2-Defaite géint den FC Royal Antwerpen huet den Anthony Moris mat Union Saint-Gilloise déi zweet Tabelleplaz an der Jupiler Pro League ofginn. Trotz enger Féierung huet de Lëtzebuerger Golkipp nach an de leschten 20 Minutten zwee Mol missen hannert sech gräiffen.

Fir Sparta Rotterdam gouf et an der hollännescher Eredivisie eng batter 0:4-Defaite géint den SC Cambuur. De Laurent Jans war an der 75. Minutt op den Terrain komm an de Mica Pinto souz déi 90 Minutten op der Bänk.

De Match an der ukrainescher Premier League war fir den Enes Mahmutovic schonn no 7 Minutten op Grond vun enger Blessure eriwwer. Ëmmerhin konnt sech den FC Lwiw um Enn nach mat 2:1 géint den FC Minaj duerchsetzen.

An der franséischer Ligue 1 gouf et fir ESTAC Troyes bei engem 1:1-Remis ee Punkt an der Partie géint Angers. Den Gerson Rodrigues war an der éischter Hallschent kuerz behandelt ginn a gouf ronn 10 Minutte viru Schluss ausgewiesselt.

An Norwegen ass de Lars Gerson bei der 3:1-Victoire vum SK Brann géint de BK Kristiansund net zum Asaz komm.

Samschdeg

An der 3. Liga an Däitschland muss sech Saarbrécken mam Maurice Deville e Samschdeg mat engem Punkt zefridde ginn. Zu Meppen ass een trotz enger 2:0-Féierung net iwwert een 2:2 erauskomm. De Lëtzebuerger gouf an der 72. Minutt agewiesselt.

A Moldawien huet Sheriff Tiraspol auswäerts Dinamo-Auto mat 7:0 iwwerrannt. De Sébastien Thill huet an der 10. Minutt fir Sheriff den 1:0 geschoss. Hie gouf an der 46. Minutt ausgewiesselt.

Den Danel Sinani verléiert mat Huddersfield um 9. Spilldag vun der zweeter englescher Liga mat 0:1 géint Swansea. De Lëtzebuerger stoung déi komplett 90 Minutten um Terrain.

An der portugisescher Coupe setzt sech Vilafranquense mam Eric Veiga mat 2:0 auswäerts bei Imortal duerch a steet domat an der nächster Ronn.

Am Championnat an der Schwäiz huet Bern mat 2:1 géint St. Gallen gewonnen. Fir d'Young Boys ass et déi drëtte Victoire noeneen. De Christopher Martins stoung bei Bern de ganze Match um Terrain.

Freideg

Och nom Trainerwiessel leeft et fir Auer weider schlecht. E Freideg den Owend huet de Veräin an der 2. Bundesliga mat 2:3 zu Regensburg de Kierzere gezunn. De Lëtzebuerger Nationalspiller Dirk Carlson stoung an der Startformatioun a gouf an der Hallschent ausgewiesselt. De Golkipp Tim Kips stoung net am Kader. Aue steet op der leschter Plaz an der Tabell.

Am ukrainesche Championnat huet den Olivier Thill bei der Victoire vu Worskla Poltawa den decisive Gol markéiert. Bei Kolos Kovalivka huet d'Ekipp e Freideg mat 1:0 gewonnen. De Lëtzebuerger huet an der 36. Minutt den entscheedende Gol geschoss.

Den Olivier Thill huet an dëser Saison schonn dräi Goler markéiert a fënnef Stéck virbereet. Poltawa steet op der drëtter Plaz an der Tabell.