De neie Stade de Luxembourg ass e Samschdeg a Presenz vum Grand-Duc feierlech ageweit ginn. Méi wéi 2.000 Spectateure ware mat dobäi.

Et war fir all d'Sportfans e laangt Waarden, huet de Sportminister Dan Kersch an senger Ried ugemierkt. Vill Hindernisser hätte missen iwwerwonne ginn, fir dass dëse Stadion, wou Rugby a Futtball ka gespillt ginn, konnt entstoen.

Extrait Dan Kersch

"Helleg" ass de Wuess vum neie Stadion net, trotzdeem gëtt en all Dag geméit. Inspiréiert gouf sech un deem vun Arsenal London, dowéinst gouf och eng Heizung am Wuess installéiert. De Stade de Luxembourg huet 9.514 Sëtzplazen an dräi Etagen.

Den éischte Match am neie Stadion war schonn den 1. September, wou Lëtzebuerg an der WM-Qualifikatioun 2:1 géint den Aserbaidjan gewonnen hat.

Am Dezember 2016 huet de Stater Gemengerot de Projet vum neie Stadion ugeholl. Am Budget ware 60.358.000 Euro virgesinn. Um Enn kascht de neie Stadion 76,6 Milliounen Euro.