An Europa ginn d'Stadien ëmmer méi voll, zu Lëtzebuerg awer wëll een dëst méi lues ugoe loossen.

Ticketverkaf géint Serbien / Reportage Rich Simon

An de Stadien uechter Europa ginn d'Diere fir Spectateuren ëmmer méi op. Vum 1. Oktober un dierf zum Beispill de Stadion a Spuenien nees komplett ausgelaascht ginn. Anescht ass dat awer hei am Land. Fir den WM-Qualifikatiounsmatch den 9. Oktober géint Serbien dierfen nëmmen 2.000 Spectateuren an de Stadion. Dat war och schonns géint Aserbaidschan de Fall.

Vill Leit froe sech, firwat net méi Leit an de Stadion dierfen, obwuel een ëmmer méi dacks Sportsmanifestatiounen am Ausland gesäit, wou zéng dausende Leit present sinn. Mir hu beim Dan Kersch nogefrot, wéini nees méi Leit an de Stadion dierfen fir d'Nationalekipp ze ënnerstëtzen.

Aktuell géif iwwert weider Lockerungen diskutéiert ginn, mä alles géif vun der Entwécklung vun den Neiinfektiounen ofhänken.

D'Lëtzebuerger hunn d'Tendenz, dat huet e bësse mat der Gréisst vun onsem Land ze dinn, ëmmer direkt iwwer d'Grenzen ze kucken. Alles dat, wat een arrangéiert, seet een, datt dat am Ausland awer anescht ass. Et kuckt een awer net, wat soss nach vu Bestëmmungen am Ausland bestinn. Ech mengen, mir kënnen hei zu Lëtzebuerg awer soen, datt mir hei besser gestallt waren, wat d'Fräiheeten ugeet, wéi all déi aner Länner ronderëm. Wann d'Zuelen et erlaben an d'Situatioun an de Spideeler, da wäerte mir esou séier wéi méiglech Ëffnungen decidéieren. Ech selwer géif de Stadion jo och gären eng Kéier erliewen, wann e ganz voll ass.

D'Regierung géif Leit weider invitéieren, sech impfen ze loossen. Zil ass et, en Impftaux vun 85% ze erreechen, fir, wann et méiglech ass, alleguer Aschränkunge kënnen op ze hiewen.

E Mëttwoch vun 12 Auer u konnt een Tickete fir de Match géint Serbien online kafen. Et huet een allerdéngs misse ganz séier sinn. Dat ass fir de Luc Holtz ee gutt Zeechen. An awer hannerléisst et och ee Bmol. Et hätt een de Stadion warscheinlech voll kritt.

Ech hu mëttlerweil matkritt, wat lass war, wéi de Virverkaf vu Serbien ugaangen ass. Wann een normalen Dag, wou déi Tickete verkaaft ginn, 10.000 Klicken gemaach ginn. E Mëttwoch waren et der 120.000. Eleng well mir géint Serbien spillen.

Nächste Samschdeg spillt d'FLF-Formatioun elo virun 2.000 Spectateuren. Den nächste Match am neie Stadion ass dann de 14. November géint Irland. Villäicht däerfen da méi Zuschauer mat dobäi sinn. Dat hänkt, dem Sport-Minister Dan Kersch no, ënnert anerem och mat der Impfbereetschaft vun der Populatioun hei zu Lëtzebuerger zesummen.

Fannt hei den Artikel an deem den Nationaltrainer Luc Holtz de 25 Mann staarke Kader presentéiert.