Déifferdeng klappt de F91 mat 3:2 iwwerdeems Stroossen Rodange bei der 4:1-Victoire keng Chance léisst. D'Una huet nëmmen nach 1 Punkt Réckstand op de F91.

Am nationale Futtball war et um Sonndeg de kompletten 9. Spilldag an der BGL Ligue.

De Progrès war zu Besuch zu Hesper an huet sech trotz méi Spillundeeler keen Avantage konnten erausspillen. Hesper ass lues a lues an de Match komm an ass duerch e fantastesche Gol vum Stolz a Féierung gaangen. De Progrès huet alles no vir geworf, a konnt tatsächlech an der 2. Minutt vun der Nospillzäit duerch den Azong nach den Ausgläich markéieren, sou dass de Match mat 1:1 op en Enn geet.

Hesper a Nidderkuer trenne sech 1:1-Gläich
De Progrès konnt an der 2. Minutt vun der Nospillzäit duerch den Azong nach den Ausgläich markéieren, sou dass de Match mat 1:1-Gläich op e Enn geet.

Am Spëtzematch stounge sech Déifferdeng an Diddeleng géigeniwwer. No enger roueger Ufanksphas ass et virun der Paus dunn hellewech gaangen. No der Féierung per Eelefmeter fir d'Lokalekipp krut kuerz dorop den Trainer vum F91 Carlos Fangueiro wéinst meckeren déi Rout Kaart gewisen. Quasi mam Gang an d'Kabinnen ass dunn nach dem Sinani den Ausgläich fir den F91 gelongen. No der Paus ass et weider immens hëtzeg gewiescht, an et ass hin an hier gaangen. De Cabral (83') ass um Enn de gléckleche Spiller, deen de Match fir d'Lokalekipp mat sengem Gol entscheede konnt. Déifferdeng klappt Diddeleng mat 3:2.

Stroossen huet am Match géint Rodange eng iwwerzeegend Leeschtung op den Terrain bruecht a ka sech um Enn mat 4:1 duerchsetzen. Virun allem an der 1. Hallschent war en däitleche Klassenënnerscheed bei béiden Ekippe festzestellen a Stroossen hätt souguer nach méi héischt kéinte féieren.

An engem attraktivem Match hu sech Rouspert a Wolz näischt geschenkt an et ass virun allem an deenen éischte 45 Minutten hin an hier gaangen. Net manner wéi 4 Goler hunn d'Spectateure konnte gesinn. Mat engem 3:1 Avantage fir Rouspert ass et an d'Kabinne gaangen. Rouspert konnt nach zwee Goler doropsetzen a gewënnt mat 5:1 géint Wolz.

Um Escher Gaalgebierg gouf et eng verdéngte Victoire fir den aktuelle Champion. Bis zum 1. Gol vun der Fola war Hamm Benfica zimmlech gutt am Match, mee no der Féierung fir d'Fola (Ahmetxhekaj, 16') gouf et awer eng däitlech Tendenz zu Gonschte vun der Lokalekipp. D'Fola gewënnt schlussendlech mat 2:1 géint Hamm Benfica.

D'Etzella war am Match géint d'Jeunesse déi besser Ekipp an ass frei duerch e Gol vum Hemkemeier (3') a Féierung gaangen. Mat der éischter richteger Chance konnt Esch den Ausgläich markéieren. Dem Einsiedler ass an der 67. Minutt den entscheedende Gol gelongen, sou dass d'Etzella 2:1 géint d'Jeunesse d'Iwwerhand behält.

Péiteng ka sech no enger rasseger zweeter Hallschent mat 4:2 géint de Racing behaapten. Iwwerdeems hunn eng ronn 680 Spectateuren zu Munneref eng 1. Hallschent op Aenhéicht gesinn. No der Paus sollten dunn d'Gäscht vun Hueschtert virum Gol äiskal zouschloen, sou dass si sech no Goler vum Habbas (62', 83') a Muric (85') kënne mat 3:0 zu Munneref duerchsetzen.

De Live Arena Gol vun der Woch

REPLAY: De Live Arena "Gol vun der Woch"

D'Resultater am Iwwerbléck (Replay an Ticker)

D'Tabell