Fir de Kont vum 9. Spilldag huet sech d'Chelsea mat 7:0 duerchgesat. ManCity huet Brighton mat 4:1 geklappt.

An der Bundesliga war et e Samschdeg d'Suite vum 9. Spilldag.

Premier League

Chelsea - Norwich City 7:0
1:0 Mount (8'), 2:0 Hudson-Odoi (18'), 3:0 James (42'), 4:0 Chilwell (57'), 5:0 Aarons (62', Selbstgol), 6:0 Mount (85', Eelefmeter), 7:0 Mount (90+1')

An England bleift Chelsea um 9. Spilldag Tabelleleader. D'Ekipp vum Tuchel huet e Samschdeg dem Opsteiger Norwich City absolutt keng Chance gelooss an de Match kloer mat 7:0 gewonnen. An der Paus louch d'Lokalekipp scho mat 3:0 a Féierung. D'Gäscht waren no enger Giel-rouder Kaart vum Gibson vun der 65. Minutt un an Ënnerzuel. De Mann vum Match war de Mount. Hien huet dräi Goler geschoss.

Brighton & Hove Albion - Manchester City 1:4
0:1 Gündogan (13'), 0:2 Foden (28'), 0:3 Foden (31'), 1:3 Mac Allister (81', Eelefmeter), 1:4 Mahrez (90+5')

Manchester City ass eng staark éischt Hallschent duergaangen, fir sech kloer mat 4:1 zu Brighton duerchzesetzen. Virun der Paus haten de Gündogan (13') an de Foden (28', 31') ManCity mat 3:0 a Féierung bruecht. An der zweeter Hallschent huet d'Lokalekipp ee ganz anert Gesiicht gewisen, ma et ass net méi duergaangen, fir de Match nach eng Kéier spannend ze maachen. Dorunner sollt och den tëschenzäitlechen 1:3 vum Mac Allister (81', Eelefmeter) näischt änneren, well de Mahrez huet an der Nospillzäit mam 4:1 fir de Schlusspunkt gesuergt.

Serie A

FC Bologna - AC Mailand 2:4
0:1 Rafael Leao (16'), 0:2 Calabria (35'), 1:2 Ibrahimovic (49', Selbstgol), 2:2 Barrow (52'), 2:3 Bennacer (84'), 2:4 Ibrahimovic (90')

No enger verspillter 2:0-Féierung an an duebeler Iwwerzuel huet den AC Mailand et an der Schlussphas zu Bologna dach nach fäerdegbruecht, fir de Match ze gewannen. De Bennacer an den Ibrahimovic, deen och e Selbstgol geschoss huet, hunn um Enn fir d'4:2-Victoire gesuergt. Mat engem Match méi steet den AC elo un der Spëtzt vun der Tabell. D'Ekipp vum Pioli huet ee Punkt Avance op Neapel.

Ligue 1

Lille - Stade Brest 1:1

De franséische Champion Lille ass net iwwert een 1:1 géint Stade Brest erauskomm. D'Lokalekipp war an der 19. Minutt duerch den David a Féierung gaangen. De Faivre hat fir d'Gäscht no 32 Minutten ausgeglach. Duerno sollt kenger Ekipp méi e Gol geléngen.

Lille steet aktuell an der Mëtt vun der Tabell. Brest steet op der Relegatiounsplaz.