Op den aneren Terrainen gouf et iwwerdeems en 1:1 tëscht Juventus an Inter Mailand an och tëscht Marseille an dem PSG gouf et kee Gewënner.

E Sonndeg stoungen am internationale Futtball eng Rei interessant Dueller um Programm. Nieft dem spueneschen El Clasico war ënnert anerem nach de Rheinderby, de franséische Le Classique an den Derby d'Italia. An England ass et iwwerdeems nach zu der Partie tëscht Manchester United a Liverpool komm.

An der däitscher Bundesliga war et iwwerdeems och d'Nouvelle, datt de VfL Wolfsburg den Trainer Mark van Bommel entlooss huet. E Samschdeg hat de VfL beim 0:2 géint Freiburg seng véiert Néierlag noenee kasséiert.

Bundesliga

Köln - Leverkusen 2:2
0:1 Schick (15'), 0:2 Bellarabi (17'), 1:2 Modeste (63'), 2:2 Modeste (82')

Bayer Leverkusen huet sech am Rheinderby zu Köln eng 2:0-Féierung verspillt a ka beim 2:2 um Enn nach frou sinn dass et ee Punkt ginn ass. Duerch d'Goler vum Schick a Bellarabi louch d'Werkself bannent zwou Minutte mat zwee Goler a Féierung a war och weider ëmmer nees geféierlech. Ronn 30 Minutte viru Schluss ass d'Partie nom Gol vum Modeste dann nach eng Kéier spannend ginn an d'Werkself huet gespuert dass de Match nach laang net entscheet war. An der 82. Minutt huet de Modeste da mat sengem zweete Gol ausgeglach a Köln huet op en drëtte Gol gedréckt. Um Enn ass et awer bei engem 2:2-Remis bliwwen.

Stuttgart - Union Berlin 1:1
0:1 Awoniyi (31'), 1:1 Faghir (90+3')

Bochum - Frankfurt 2:0
1:0 Blum (3'), 2:0 Polter (90+2')

Premier League

West Ham - Tottenham 1:0
1:0 Antonio (72')

Manchester United - Liverpool 0:5
0:1 Keita (5'), 0:2 Diogo Jota (13'), 0:3 Salah (38'), 0:4 Salah (45+5'), 0:5 Salah (50')

Manchester United huet um 9. Spilldag e schwaarzen Dag erwëscht. Liverpool huet de Match vun Ufank un dominéiert a louch sou schonn an der Paus mat 4:0 a Féierung. An der zweeter Hallschent huet de Salah dann nach den Dräierpack perfekt gemaach an d'Red Devils virun den eegene Spectateure mat 5:0 iwwerrannt.

Serie A

AS Roum - Neapel 0:0

Inter Mailand - Juventus 1:1
1:0 Dzeko (17'), 1:1 Dybala (89')

Juventus huet sech duerch e spéiden Eelefmeter am Derby d'Italia ee Punkt geséchert. No 17 Minutte huet den Dzeko Inter Mailand a Féierung bruecht an hat och am weidere Spillverlaf méi vum Match. Wéi alles schonn no enger Victoire fir d'Hauhsären ausgesinn huet, gouf nom Asaz vum Videoarbitter op Eelefmeter entscheet. Den Dybala huet vum Punkt d'Nerve behalen an huet der Bianconeri sou ee spéiden an och gléckleche Punkt geséchert.

Ligue 1

Nice - Lyon 3:2
0:1 Toko Ekambi (35'), 0:2 Aouar (68'), 1:2 Atal (81'), 2:2 Delort (89'), 3:2 Guessand (90+2')

Marseille - PSG 0:0

De franséische Le Classique ass mat engem 0:0 op en Enn gaangen. An enger animéierter an intensiver Partie am Stade Velodrome ass trotz ville Golchancë kenger Ekipp e Gol gelongen. De PSG war dobäi fir ronn 30 Minutten an Ënnerzuel, dat nodeems den Hakimi duerch eng Noutbrems déi Rout Kaart gesinn huet. E Gewënner sollt et e Sonndeg den Owend awer net ginn.

La Liga

Sevilla - Levante 5:3
1:0 Oliver (8'), 2:0 Rafa Mir (24'), 2:1 Morales (33'), 3:1 Diego Carlos (38'), 4:1 Munir (50'), 4:2 Morales (55'), 4:3 Melero (61'), 5:3 Fernando (64')

Barcelona - Real Madrid 1:2
0:1 Alaba (32'), 0:2 Vazquez (90+3'), 1:2 Aguero (90+7')

Fir den FC Barcelona gouf et an der spuenescher La Liga déi véiert Defaite am El Clasico hannerteneen. Den Alaba hat Real Madrid an der éischter Hallschent a Féierung bruecht, de Lucas Vazquez huet mat sengem Gol an der 93. Minutt dann den Deckel drop gemaach. Mat der leschter Aktioun vum Match ass de Katalanen dann nach den 1:2 gelongen, dat huet un der Victoire fir Real awer näischt méi geännert.