D'Ekipp vum Lëtzebuerger Nationalspiller huet am norwegesche Championnat d'Partie géint Viking FK mat 0:2 verluer a steet op der Relegatiounsplaz.

A Griichenland steet de Vahid Selimovic mat OFI Kreta an den Aachtelsfinalle vun der Coupe. D'Ekipp vum Lëtzebuerger Nationalspiller huet sech mat 1:0 géint Acheron Kanalaki duerchgesat.

No enger laanger Verletzungspaus hat de Lars Gerson en Donneschdeg säin éischten Asaz bei senger neier Ekipp Brann Bergen (Norwegen). De Lëtzebuerger stoung an der Startformatioun, ma huet an der 11. Minutt wéinst enger Blessur nees missen den Terrain verloossen. Brann Bergen huet mat 0:2 géint Viking FK verluer.

De Lars Gerson huet sech un den Adduktore blesséiert. Wéi laang hie wäert ausfalen, ass den Ament nach net gewosst.

Den New York City FC huet sech an der MLS mat 1:0 géint Chicago Fire duerchgesat. De Maxime Chanot stoung bei der Lokalekipp déi 90 Minutten iwwer um Terrain.

Mëttwoch

D'Young Boys Bern an de Christopher Martins kënnen an dëser Saison net méi den Doublé maachen. E Mëttwoch den Owend huet een nämlech an der Aachtelsfinall vun der Coupe mat 1:2 zu Lugano verluer. De Lëtzebuerger Nationalspiller gouf an der Paus ausgewiesselt.

An der Ukrain steet Worskla Poltawa an der Véierelsfinall vun der Coupe. Olivier Thill a Co hu bei Veres-Rivne mat 3:1 gewonnen. De Lëtzebuerger gouf an der 89. Minutt ausgewiesselt. De Vincent Thill ass weider blesséiert.

An Holland war Sparta Rotterdam e Mëttwoch den Owend am drëtten Tour vun der Coupe gefuerdert. Mam Laurent Jans an dem Mica Pinto an der Startformatioun huet Sparta Rotterdam sech mat 2:0 zu Veenendaal behaapt. De Jans gouf an der Paus ausgewiesselt. De Pinto huet duerchgespillt.

A Moldawien huet Sheriff Tiraspol d'Aachtelsfinall vun der Coupe kloer mat 6:0 géint Saxan Gaugaz Yeri gewonnen. De Sébastien Thill gouf bei Sheriff geschount a souz just op der Bänk.

Dënschdeg

Am DFB-Pokal war de Leandro Barreiro mam FSV Mainz gefuerdert. Am Duell vun de Bundesligisten haten déi Mainzer d'Heemrecht kritt. Vun der Bänk aus huet de roude Léiw missten den 1:0 fir d'Gäscht erliewen, dat kuerz nom Upëff. An der 2. Minutt hat den Okugawa den Zentner am Gol vun de Mainzer mat engem Lopp bezwongen. Déi Mainzer hu laang op eng Äntwert gewaart, ma eng gutt Flank vum Onisiwo huet an der 53. Minutt de Burkardt fonnt, dee mam Kapp den 1:1 maache konnt a seng Ekipp domadder zeréck an d'Spill bruecht huet. Dono war de Knuet bei de Mainzer geplatzt an et war 6 Minutte méi spéit den Onisiwo, deen de Match dréine konnt. An der 66. Minutt gouf de Leandro Barreiro dunn agewiesselt, fir ze hëllefen, de Virsprong an dësem wichtege Match ze halen oder esouguer nach auszebauen. Ma weder dat eent, nach dat anert ass gelongen. An der 89. Minutt huet de Fabian Klos no Flank vum Wimmer den 2:2 markéiert an esou d'Verlängerung erzwongen. Do ass an den éischte 15 Minutte wéineg geschitt, ma nom Säitewiessel hate béid Ekipp hir Chancen. Den Ingvartsen huet et du fir Mainz an der 115 Minutt ideal gemaach a mat engem proppere Schoss vum Rand vum Strofraum den 3:2 markéiert. Mat deem Score an no 120 Minutte hu sech déi Mainzer fir d'Aachtelsfinalle vum DFB-Pokal qualifizéiert.

Auswäerts huet den Anthony Moris mat Royale Union Saint-Gilloise missten untrieden. Am belsche Championnat leeft fir den Opsteiger jo alles besser, wéi geplangt, ma elo huet et geheescht, déi gutt Saison och an der Coupe beim KV Mechelen weiderzeféieren. De Lëtzebuerger, deen normalerweis de Gol vum aktuellen Tabellenéischte hitt, krut an der Coupe eng Paus a souz just op der Bänk. Do huet hien da missten nokucken, wéi säi Vetrieder Pirard no 16 Minutten hannert sech huet misst gräifen an den 1:0 fir d'Heemekipp war duerch den Shved gefall. No 64 Minutten dunn den 2:0 duerch den Hairemans. De Vanzeir konnt an der 82. Minutt nach op 1:2 verkierzen, ma et sollt zum Schluss net méi duergoen, fir de Match ze dréinen. Esou ass de Lëtzebuerger Nationalgolkipp mat sengem Veräin Saint-Gilloise an der Coupe eliminéiert.