Donieft spillt de Leandro Barreiro 1:1 mat Mainz géint Köln an de Gerson Rodrigues an Troyes verléieren mat 0:1 géint St. Etienne.

An der éischter Ukrainescher Divisioun huet den Olivier Thill alt nees eng kéier ganz staark op sech opmierksam gemaach. Mat 2 Goler an 2 Virlagen huet de Lëtzebuerger Worskla Poltawa zu enger 5:1-Victoire géint Mariupol gefouert. Domadder huet den Nationalspiller elo schonn 8 Goler a 7 Virlagen an 13 Matcher an dëser Saison um Konto stoen.

An der éischter Belscher Liga kënne sech den Anthony Moris an Royal Union Saint-Gilloise mat 7:1 géint Oostende duerchsetzen. De Lëtzebuerger Nationalgolkipper stoung de ganze Match um Terrain. An der Tabell steet Saint-Gilloise op der 1. Plaz an huet e Virsprong vu 7 Punkten op déi 2. Plaz.

An der Bundesliga gouf de Leandro Barreiro bei Mainz an der 34. Minutt fir de blesséierte Kohr agewiesselt. Um Enn spillt Mainz 1:1 géint Köln no Goler vum Burkardt (Mainz) an Özcan (Köln).

Agewiesselt gouf de Gerson Rodrigues bei der 0:1-Néierlag vun Troyes géint St. Etienne an der éischter franséischer Liga. D'Néierlag konnt de Lëtzebuerger net verhënneren. An der Tabell steet Troyes op der 17. Plaz.

An der éischter éisträichescher Divisioun koum Austria Wien net iwwert en 0:0 zu Klagenfurt eraus. Opgrond vun enger Blessure stoung de Marvin Martins net am Kader.

An der Coupe a Portugal ass den Eric Veiga mat Vilafranquense mat 0:1 géint Mafra erausgeflunn. De Lëtzebuerger huet vun Ufank u gespillt a war Kapitän.

Samschdeg

An der zweeter englescher Liga huet den Danel Sinani den decisive Gol bei der 1:0-Victoire vun Huddersfield géint West Bromwich geschoss. Et ass deen zweete Gol vum Lëtzebuerger Nationalspiller an dëser Saison.

Den Dirk Carlson stoung 90 Minutten um Terrain a konnt sech mat Erzgebirge Aue zu Rostock mat 2:1 duerchsetzen. Duerch de véierte Match ouni Néierlag konnt sech Aue op déi 13. Plaz verbesseren.

Och den Enes Mahmutovic konnt sech mat senger Ekipp Lviv beim 2:1 géint Luhansk dräi Punkte sécheren. De Lëtzebuerger huet de Match duerchgespillt.

De Sébastien Thill huet bei der 3:1-Victoire vu Sheriff Tiraspol zu Floresti de ganze Match duerchgespillt. Tiraspol ass ganz uewen an der Tabell, obwuel d’Ekipp zwee Matcher manner um Kont huet.

A Griichenland huet Kreta mam Vahid Selimovic 2:0 auswäerts bei Volos gewonnen. Den Ofwierspiller gouf an der 79. Minutt agewiesselt.

Sparta Rotterdam huet an der 1. Liga an Holland 0:1 géint Twente verluer. De Mica Pinto ass an der 85. Minutt ausgewiesselt ginn. De Laurent Jans souz de ganze Match op der Bänk.

An Zypern huet den Tim Hall mat Achnas eng 0:3-Defaite géint Paphos missen astiechen. Den Hall krut an der 44. Minutt eng giel Kaart gewisen.

Freideg

An der 3. Liga an Däitschland huet e Freideg den Owend Saarbrécken mam Maurice Deville mat 4:2 zu Verl gewonnen. De Lëtzebuerger Futtball-Nationalspiller gouf an der 54. agewiesselt an huet an der 71. Minutt den tëschenzäitlechen 2:2-Ausgläich fir Saarbrécken geschoss. Duerch dës Victoire bleift Saarbrécken uewen an der Tabell mat drun.