E Samschdeg hat d'FLNS, déi Lëtzebuerger Schwammfederatioun, hir uerdentlech Generalversammlung.

E Samschdeg hat d'FLNS, déi Lëtzebuerger Schwammfederatioun, hir uerdentlech Generalversammlung zu Esch. Et war eng ganz roueg, bei där et och keng Wuertmeldunge goufen.Wéi dat an de leschte Méint ëmmer de Fall ass, ass een op der Assemblée net laanscht d'Corona-Problematik komm.

Generalversammlung FLNS / Reportage Rich Simon

D'FLNS, dat ass net nëmme d'Sportaart schwammen. Déi wier dem President vun der FLNS no, Marco Stacchiotti, relativ gutt duerch d'Corona-Kris komm. Virun allem konnt ee relativ normal trainéieren, well et kee Kierperkontakt gouf. Anescht huet dat awer am Waasserball, dem Synchronschwammen ausgesinn.

 

Déi Leit konnten trainéieren, mee just ganz eleng. Respektiv op de Gol schéisse wat de Waasserball ugeet. De Sauvetage war komplett verbuede bis de Summer.

An de Sauvetage-Problem war ee groussen. Nom Summer huet vill mussen opgeschafft ginn.

Fir datt d'Léierpersonal de Sauvetage Brevet kritt an och eis Traineren. Dat ass dee gréisste Punkt, wou mir gelidden hunn.

RTL

© Rich Simon (RTL)

De Problem ass net nei. Eng konkret Léisung gëtt et awer nach net. Et ginn net genuch Piscinne bei eis am Land. Doduercher léiere vill Kanner net méi schwammen. Déi Piscinnen, déi et den Ament ginn, sinn dacks an ee Schoulkomplex integréiert. An dat bréngt fir de Marco Stacchiotti eng gewësse Problematik mat sech.

 

Déi si ronn 15-16 Wochen am Joer zou. Si ginn awer gehëtzt, do leeft Maintenance drop. Mee mir kommen net eran. Dat ass well d'Schoulpersonal an d'Vakanz geet. Wat jo normal ass. Ech ka keen Direkter zwéngen, Personal dohinner ze stellen. Op där anerer Säit hätt ech gäre vum Ministère, an dat hat ech schonns virun 2 Joer ugedeit, datt ee Kader misst geschaaft ginn tëscht der Educatioun, dem Ministère des Sports, well et geet jo ëm de Sport. Esou wéi ech verstanen hu, geet et net nëmmen ëm Piscinnen, mee och ëm Turnhalen. Ëm wat geet et? Et geet ëm ee Portier, deen eis op an zou späert an deen déi néideg Alerte ka ginn, wann ee Problem wier. Zum Beispill un der Technik.

De fréiere Schwëmmer Bob Ulveling gouf nei an de Conseil vun der Schwammfederatioun opgeholl.

RTL

© Rich Simon (RTL)