Nodeem et am Allersmatch Wiener Neustadt eng 0:5-Néierlag gouf, hunn d'Gäscht dëst Kéier géint d'Rout Léiwinnen nach eng Schëpp dropgeluecht.

Vun Ufank un huet Éisträich Drock gemaach a sech Chancen erausgespillt. Eng éischte Kéier gouf Lëtzebuerg opfälleg bei enger méi onschéiner Zeen, bei där d'Kremer Giel gesinn huet. Fir d'Éisträichesch Spillerin Kirchenberger war de Match dowéinst och no 15 Minutten eriwwer. Dono koumen staark 10 Minutte vun de Gäscht, an deenen d'Enzinger dräi Mol (16'. 17' an 23') an d'Billa ee Mol (27') getraff huet. Bis d'Paus sollt et bei deem Stand bleiwen.

Awer direkt nom Säitewiessel an der 48. Minutt huet d'Dunst dunn op 5:0 erhéicht, an no enger Stonn gouf et de 6:0 duerch d'Höbinger (60'), de 7:0 duerch d'Billa (62') an den 8:0 duerch d'Zadrazil (68'). An de leschten 20 Minutten haten d'Éisträicherinnen nach dräi Ofschlëss, aus deene si keen Avantage zéie konnten, esou datt et beim 8:0 fir d'Gäscht bliwwen ass.

"Et ass blöd gelaf. Déi 11 Minutten hätte mir vill besser kéinte maachen. Et ass alt geschitt. Mir haten awer och bei puer Goler kee Gléck. Mir haten och puer Verletzter déi an der Ekipp wichteg fir de Match gewiescht wieren. Mir hunn och den éischte Match phenomenal gutt gespillt an der éischter Hallschent. Et war och normal, datt si mat 120 Prozent kommen", sou d'Lucie Schlimé, dat an den zweete 45 Minutten nach véiermol huet missen hannert sech gräifen.

An der Tabell bleiwen d'Lëtzebuergerinne mat 3 Punkten op der 4. Plaz. Am Abrëll ass den nächste Géigner Lettland. D'Ekipp huet op der leschter Plaz an der Tabell nach kee Punkt.

Nom Match koum d'Nouvelle, datt sech d'Éisträicherin Kirchenberger beim Foul d'Schinnen - an d'Wuedebeen gebrach huet. Si gouf nach an der Nuecht op e Mëttwoch operéiert.