A villen Eenzelsportaarten ass Wanterpaus. Dat gëllt zum Beispill och fir d'Jenny Warling.

D'Olympiaqualifikatioun huet d'Karateka in extremis verpasst a bei der Weltmeeschterschaft gouf se virun enger gudder Woch an den Halleffinallen disqualifizéiert. Dat waren déi negativ Aspekter vun der Saison 2021. Fir de Recht war d'Jenny Waring awer ganz zefridde mat de leschte Méint.

Jenny Warling Saison 2021 / Rep. Rich Simon


"Ech denken, et ass eng vu menge beschte Saisonen: 5. op engem Quali-Tournoi fir Olympia, 5. op der Weltmeeschterschaft, 7. op der Europameeschterschaft an eng Medail op engem K1. dat hat ech och schonns laang net méi. Et hätt nach bësse besser sinn, wann ech méi Chance gehat hätt. Mä datt ech 2 oder 3 Mol esou ee gudden Dag hat wou et drop ukomm ass, sinn ech scho wierklech frou driwwer"
, sou d'Jenny Warling.

D'Jenny Warling schléisst d'Saison op der 7. Plaz an der Weltranglëscht of. Dat ass dat beschte Klassement wat d'Karateka bis elo an hirer Karriär hat. D'Olympiagewënnerin, d'Bulgarin Ivet Goranova, op der 10. Plaz.

Karate 2024 wuel net méi olympesch

Op den Olympesche Spiller zu Tokio war dëst Joer eng éischte Kéier iwwerhaapt de Karate vertrueden. dat kéint eng eemoleg Saach gewiescht sinn. An 3 Joer zu Paräis, ass de Karate bis elo jiddwerfalls net virgesinn.

Karate bei Olympia/Reportage Jenny Warling

Eng ganz kleng Hoffnung besteet awer nach. De Fransous Steven Da Costa, deen zu Tokio d'Goldmedail gewonnen huet, mécht sech den Ament ganz staark, fir datt seng Sportaart a sengem Heemechtsland nach an de Programm opgeholl gëtt. D'Jenny Warling, wat d'Olympiaqualifikatioun esou just net gepackt huet, ass awer äusserst skeptesch, datt de Karate an der franséischer Haaptstad mat dobäi ass.

"Ech denke fir Paräis sécher net. Ob et elo fir 2028 nees an de Programm kënnt, dat hoffen ech. Ech sinn zwar warscheinlech een Tick ze al. Ech si frou, datt de Karate dobäi ass. Ob ech dann dobäi sinn oder net. Ech weess jo net, ob ech dann iwwerhaapt nach Karate maachen."

D'Jenny Warling seet, datt et gutt war, datt de Karate zu Tokio mat dobäi war. Allerdéngs war et net gutt, datt dat an enger ofgespeckter Form de Fall war. Dat hätt dat Ganzt bësse verfälscht.

"Bei Tokio waren 10 Stéck an et ware reduzéiert Gewiichtskategorien. Et ass net representativ, wéi zum Beispill op enger Weltmeeschterschaft. Do si 5 Kategorien, hei sinn der 3 gewiescht. Do si Leit, déi aus verschiddene Kategorië géintenee kämpfen, wat ech net fair fannen. Bei Olympia waren der 10 Stéck dobäi. Dat ass net vill, wann ee bedenkt, datt dat zwou Gewiichtskategorië sinn."