E Comeback schléisst d'Karateka net aus, wëll sech awer net op een Datum festleeën.

Kimberly Nelting hält op / Rep. Rich Simon

D'Kimberly Nelting mécht eng Paus als Héichleeschtungssportlerin. An dat mat grad emol 21 Joer. Dat huet d'Karateka elo offiziell matgedeelt. Déi Decisioun ass awer schonns méi laang gefall: "Ech hu gemierkt, datt ech wärend dem Training net méi esouvill Spaass hat. Ech wollt léiwer doheem bleiwen. D'Motivatioun war net méi do esou wéi fréier. Meng Energie war einfach net méi do. Ech konnt net méi esou schnell sinn. Och wann ech wollt, et ass einfach net méi gaangen. Ech sinn do wierklech un eng Limitt gestouss. Kierperlech konnt ech net méi iwwer déi Grenz eraus goen. Och wann ech mir am Kapp gesot hunn, probéier nach méi."

D'Kimberly Nelting

Virun der Europameeschterschaft am August hat d'Kimberly Nelting u sech schonns decidéiert, fir méi kuerz ze trëppelen. Op der EM gouf d'Karateka awer nach Europameeschterin vun den U21. Dat war mam Weltmeeschtertitel bei de Juniorinnen de bis elo gréissten Erfolleg an hirer Karriär. D'Kimberly Nelting wëll sech elo nach net drop festleeën, wéi laang d'Paus soll oder wäert daueren: "Ech hu kierperlech, mä och mental ganz vill gelidden. D'Batterië si ganz eidel an dofir kucken ech elo no menger psychescher Gesondheet. Ech huele mir elo och Zäit, fir a mengem anere Liewen ze kucken, wat ech maache wëll: Studium, wéi soll et weider goen? Ech kann net direkt soen, wéi laang et wäert daueren."

D'Kimberly Nelting langweilt sech ouni de Karate den Ament net. Si ersetzt an de Schoulen a wëll deemnächst mat engem Psychologie-Studium ufänken an och d'Schauspillerei ass een Thema. Dofir steet ee Wiessel op Berlin um Programm. Trotz dëse Projete schléisst d'Kimberly Nelting awer ee Comeback net kategoresch aus: "Ech mengen, et ass zimmlech warscheinlech, datt ech iergendwa wäert zeréck kommen. Wéini, ass awer ganz ondefinéiert. Ech loosse mir genuch Zäit a setze mech net ënner Drock, fir elo nees op héijem Niveau zeréckzekommen. Dat ass grad net mäin Zil. Ech hunn den Ament aner Ziler an op déi konzentréieren ech mech elo."

Bei der Wiel zu Sportlerin vum Joer koum d'Kimberly Nelting hannert dem Christine Majerus dat leschte Joer op déi zweete Plaz.

De Palmarès vum Kimberly Nelting:

Insgesamt 117 Mol um Podium / 61x Gold, 28x Sëlwer, 28x Bronze

Junior Weltmeeschterin 2017

U21 Europameeschterin 2021

Wado Kai Europameeschterin 2015

10x Europameeschterin vun de "klengen Staaten" (Kumite/Kata/Team)

13x Landesmeeschterin (Kata & Kumite)

Nowuesssportlerin vum Joer 2017 (Jeune Espoir Feminin)

Zweete Plaz vun der Sportlerin vum Joer 2020