Seng Affekoten hunn dës Decisioun awer elo geriichtlech ugefecht.

Deemno ass hei nach keng definitiv Decisioun getraff, ob hien dann elo däerf un den Australian Open deelhuelen oder ob hien d'Land muss verloossen. Bis zu senger Befroung e Samschdeg de Moie bleift hie mol op fräiem Fouss, heescht et vun der Regierung.

Den Immigratiounsminister huet senge Decisioun geholl op Basis vum Artikel 133C(3) vum Migratiounsgesetz, aus Grënn vun der Gesondheet an der gudder Uerdnung, well dëst am ëffentlechen Interessi géif leien, esou den Hawke. Hien hätt d'Informatioune vum Inneministère, vun der Australian Border Force a vum Här Djokovic genee gepréift. D'Regierung wier fest entschloss, d'Grenze vun Australien ze schützen, besonnesch am Bezuch op d'Covid-19-Pandemie.

Egal wéi d'Causa Djokovic awer ausgeet, fir d'Mandy Minella werft et kee gutt Bild op de Serb.

Mandy Minella: Et ass erschreckend fir esou ee Superstar. Entweder ass e ganz schlecht beroden oder huet e puer domm Feeler gemaach. Iergendwéi huet hie sech an der ganzer Situatioun Onrecht gemaach. Hie geet net mam gudde Beispill vir. Mol kucken, wéi hien aus der Affär erauskënnt.

Am Laf vum Dag dierften et weider Detailer ginn, wat déi Decisioun vum Immigratiounsminister fir Repercussiounen huet. Weider huet och d'Geriicht sech um Freideg de Moien eng weider Kéier mat der Affär befaasst. Sollt seng Ausweisung bestätegt ginn, riskéiert hien 3 Joer net dierfen an Australien anzereesen.

Djokovic Problemer an Australien / Rep. Rich Simon