Beim Regio Indoor-Meeting an der Coque gouf et e Samschdeg fënnef nei Lëtzebuerger Rekorder.

D'Patrizia Van der Weken ass e Samschdeg an der Coque iwwer 50 an iwwer 60 Meter een neie Lëtzebuerger Rekord gelaf. Iwwer 50 Meter steet déi nei Beschtzäit elo bei 6 Sekonnen an 29 Honnertstel an iwwer 60 Meter bei 7 Sekonnen an 28 Honnertstel. D'Lëtzebuergerin ass domadder ënnert der Norm (7,30 Sekonnen) fir d'Indoor-WM zu Belgrad bliwwen.

De François Grailet huet de Lëtzebuerger Rekord iwwer 60 Meter Hecken direkt zweemol verbessert. An de Virleef ass de Chrono no 7 Sekonnen an 80 Honnertstel stoe bliwwen an an der Finall no 7 Sekonnen a 75 Honnertstel. Him feelen elo nach just 3 Honnertstel, fir d'Norm fir d'Indoor-WM ze knacken.

An dann ass och nach d'Victoria Rausch een neie Lëtzebuerger Rekord iwwer 60 Meter Hecke gelaf. Mat enger Zäit vun 8 Sekonnen a 26 Honnertstel ass d'Lëtzebuergerin 3 Honnertstel ënner hirem eegene Rekord vu virun enger Woch bliwwen.

Hei fannt Dir déi komplett Resultater.