Real Madrid entgeet knapp enger Blamage géint Elche a Wolfsburg verléiert nees. An Italien schéisst Roum dräi Goler bannent véier Minutten.

An Holland war um Sonndeg de Spëtzematch tëscht der Éischtplacéierter PSV Eindhoven an dem Rekordchampion Ajax Amsterdam. Hei konnt sech Ajax mat 2:1 zu Eindhoven duerchsetzen an iwwerhëlt nees d'Tabelleféierung. De Verfollger Feyenoord Rotterdam konnt sech mat enger 4:1-Victoire zu Nijmegen un de Spëtzenduo eruntaaschten.

Bundesliga

Leipzig - Wolfsburg  2:0
1:0 Orban (76.), 2:0 Gvardiol (84.)

Leipzig gewënnt och déi véiert Partie am neie Joer a klëmmt an der Tabell ëmmer méi no uewen. D'Sachse ware beméit d'Spill ze maachen, goufen awer iwwer wäit Strecke gutt vun de Wolfsburger doru gehënnert hiert Spill duerchzezéien. Leipzig konnt sech eréischt zum Schluss vum Match méi kloer Chancen erausspillen a goung duerch den Orban (76.) a Féierung. Kuerz duerno huet de Gvardiol zum 2:0 eragesat an de Match fir d'Leipziger kloergemaach. Fir Wolfsburg war et déi zéngt konsekutiv Néierlag.

Hertha Berlin - Bayern München 1:4
0:1 Tolisso (25.), 0:2 Müller (45.), 0:3 Sané (75.), 0:4 Gnabry (79.), 1:4 Ekkelenkamp (80.)

An der zweeter Partie um Sonndeg gewannen d'Bayern kloer mat 4:1 zu Berlin. München huet de Match vun Ufank un dominéiert, krut an der zweeter Minutt schonn e Gol vum Tolisso duerch de VAR oferkannt, an ass an der 25. Minutt duerch den Tolisso a Féierung gaangen. Den Thomas Müller huet nach virun der Paus op 2:0 erhéicht. No der Paus ass de Match trotz ville Wiesselen op der Säit vun de Berliner änlech verlaf an d'Bayern hu bannent fënnef Minutten de Match decidéiert. De Sané an de Gnabry hunn op 3:0 respektiv 4:0 erhéicht. Am Géigenzuch ass Berlin den Éieregol duerch den Ekkelenkamp gelongen. München läit elo an der Tabell nees sechs Punkte virun Dortmund.

Premier League

Arsenal - Burnley  0:0

Crystal Palace - Liverpool  1:3
0:1 van Dijk (8.), 0:2 Oxlade-Chamberlain (32.), 1:2 Edouard (55.), 1:3 Fabinho (89.)

Duerch dës Victoire ka Liverpool vum Punktverloscht vu Manchester City um Samschdeg zu Southampton profitéieren a verkierzt de Retard op de Leader op néng Punkten.

Chelsea - Tottenham 2:0
1:0 Ziyech (47.), 2:0 Silva (55.)

Chelsea bleift no dëser Victoire an der Tabell u Liverpool drun a beleet déi drëtt Plaz. Tottenham bleift duerch d'Néierlag op der siwenter Plaz hannert Arsenal a West Ham.

Serie A

Empoli - AS Roum 2:4
0:1 Abraham (24.), 0:2 Mancini (33.), 0:3 Oliveira (35.), 0:4 Zaniolo (37.), 1:4 Pinamonti (55.), 2:4 Bajrami (72.)

D'AS Roum huet an der éischter Hallschent kuerze Prozess mat Empoli gemaach a bannent véier Minutten dräi Goler markéiert, wouvun Empoli sech net méi erhuele konnt. No der Paus huet Roum et méi lues ugoe gelooss an Empoli konnt nach zwee Goler markéieren.

AC Mailand - Juventus (20.45 Auer)

Ligue 1

Metz - Nice 0:2
0:1 Thuram (58.), 0:2 Gouiri (86.)

Méi Detailer zum Match vun de Grenats fannt dir bei de Kolleege vun RTL 5minutes.

Montpellier - Monaco 3:2
1:0 Wahi (13.), 2:0 Mavididi (32.), 2:1 Ben Yedder (34.), 2:2 Vanderson (82.), 3:2 Mavididi (90.+1)

Paris SG - Reims (20.45 Auer)

La Liga

Real Madrid - Elche 2:2
0:1 Boye (42.), 0:2 Milla (76.), 1:2 Modric (82., Eelefmeter), 2:2 Militao (90.+2)

Real Madrid ass an der spuenescher La Liga nëmme knapp enger Blamage entgaangen. Eréischt an de Schlussminutte konnten déi Kinneklech géint de Géigner aus Elche, 15. an der Tabell, verkierzen an ausgläichen. Fir Real hat de Benzema an der éischter Hallschent en Eelefmeter verschoss. Elche war virun der Paus mat 1:0 a Féierung gaangen a konnt no knapp 30 Minutten an der zweeter Hallschent e weidere Gol markéieren. An de leschte Minutten hunn de Modric duerch en Eelefmeter an de Militao Madrid nach ee Punkt gerett.