Huddersfield huet um Méindeg de Retourmatch am Playoff mat 1:0 géint Luton gewonn.

No der Victoire doheem am Retourmatch vum Playoff an der Championship spillt Huddersfield elo den 29. Mee d'Finall ëm den Opstig an d'Premier League. Den Danel Sinani ass an der 61. Minutt ausgewiesselt ginn.

Um Méindeg den Owend huet den Tim Hall mat Achnas 1:1 géint Nicosia gedeelt um zweetleschte Spilldag an der zypriotescher Liga. Achnas steigt of.

Sonndeg

An der Nuecht op e Sonndeg eiser Zäit war de Maxime Chanot mam New York City FC am Asaz. De Lëtzebuerger huet vun der Bänk aus materlieft, wéi seng Ekipp sech 2:0 no Goler vu Magno (9'), an Castellanos (57') géint Columbus Crew konnt behaapten.

An der Eredivisie huet sech Sparta Rotterdam um leschte Spilldag mat enger 3:1-Victoire géint den direkte Konkurrent Heracles Almelo gerett a bleift an der héchster Liga an Holland. De Mica Pinto gouf an der 79. Minutt agewiesselt, de Laurent Jans souz 90 Minutten op der Bänk.

Um leschte Spilldag an der zweeter däitscher Bundesliga huet de Maurice Deville mat Sandhausen 3:1 géint Holstein Kiel gewonnen. De Lëtzebuerger Nationalspiller gouf an der 83. Minutt agewiesselt. Och fir de Veräin vum Tim Kips an Dirk Carlson gouf et e verséinlechen Ofschloss vun der Saison, trotz dem Ofstig an déi Drëtt Liga. Aue gewënnt den Ofsteigerduell géint Dynamo Dresden mat 1:0. Béid Lëtzebuerger stoungen net am Kader.

De Marvin Martins an Austria Wien gewannen um zweetleschte Spilldag 2:1 géint Klagenfurt a stinn elo op Plaz 3, wat d'Qualifikatioun fir d'Conference League bedeit.

Samschdeg

E Samschdeg huet den Optakt vun de Lëtzebuerger Futtballer am Ausland de Vincent Thill gemaach, dee ronn 62 Minutte bei der 2:1-Victoire vun Örebo an der zweeter schwedescher Liga géint Östers um Terrain stoung. De Lëtzebuerger war net un de Goler vum Bjorndhal a Milleskog bedeelegt, krut awer an der 50. Minutt eng giel Kaart.

Ouni den Eldin Dzogovic am Kader konnt den FC Magdeburg beim VFL Osnabrück beweisen, wisou si mat 14 Punkten Avance op den Zweete scho méi laang als Opsteiger an déi 2. Bundesliga feststinn. 5:1 konnt de Favorit auswäerts gewannen an hir Dominanz an dëser Liga ënnermaueren.

Fir déi fënnef Lëtzebuerger, déi fir Jammerbugt an der zweethéchster dänescher Divisioun spillen, gesäit et aktuell net gutt aus. No enger knapper 2:3 Néierlag géint Hobro IK mussen déi lescht 3 Spilldeeg alles klappen, fir datt si net ofsteigen. Vun de fënnef Lëtzebuerger hunn den Ikene an den Pimentel de Match ugefaangen, woubäi de Pimentel no 85 Minutten ausgewiesselt gouf. De Gomes koum zu deem Ament bei engem zweete Wiessel op den Terrain, konnt awer an de leschte Minutten net méi treffen. Natami a Bouché waren net am Kader.

An der zweeter tierkescher Liga stoungen de Gerson Rodrigues an den Oli Thill vun Ufank u bei Eyüspor géint Kocaelispor um Terrain. An de Rodrigues hat eng ganz staark Ufanksphas an huet no Goler an der 8. an 14. Minutt seng Ekipp 2:0 a Féierung bruecht. No ronn enger Stonn huet de Yavus vum Punkt op 2:1 verkierzt. Béid Lëtzebuerger hunn de Match duerchgespillt. Eyüpsopor festegt mat dësen dräi Punkten déi sechste Plaz, mat där si fir d'Finallronn fir den Opstig qualifizéiert wieren. Et bleiwen nach 3 Spilldeeg.

An der Bundesliga si jo direkt zwee Lëtzebuerger aktiv. De Mathias Olesen dierf déi nächst Saison mat Köln Conference League spillen, dat trotz enger 1:2-Las-Minutte-Néierlag zu Stuttgart, wou de Lëtzebuerger déi ganz 90 Minutten op der Bänk souz. Den 2:2 tëscht Frankfurt a Mainz mam Leandro Barreiro, deen an der 64. Minutt agewiesselt gouf, bréngt net wierklech eng vun deen zwou Ekippen no vir, déi awer ee béid weder eppes mam Ofstig nach mam internationale Geschäft méi ze dinn haten.

Eng 0:5-Néierlag gouf et fir OFI Kreta ouni de Vahid Selimovic géint Volos. Trotzdeem bleift Kreta op der 1. Plaz vum Ofstigsgrupp a wäert nom leschte Spilldag och déi nächst Saison an der héchster griichescher Liga spillen.

Am Moldawien huet Sheriff Tiraspol hire Championstitel mat enger 2:0-Victoire bei Sf.Gheorghe nach eng Kéier ënnermauert. De Sebastien Thill stoung beim Champion net am Kader.

Eng batter 2:4 Néierlag géint Trofense gouf et fir Vilafranquense mam Eric Veiga an der 2. portugisescher Divisioun. Wéi den Eric Veiga an der 62. Minutt agewiesselt gouf, war seng Ekipp 0:2 hannen a konnt nach virun der 70. Minutt den Ausgläich markéieren. Ma Trofense hat de Capita an hire Reien, deen e richteg gudden Dag erwëscht hat, an hien huet an der 74. an 78. Minutt säin zweeten an drëtte perséinleche Gol an dësem Match geschoss. Béid Ekipp bleiwen am ënneschten Deel vum Mëttelfeld, hunn awer no hirem leschte Match näischt méi mam Ofstig ze dinn.

90 Minutte laang souz den Edin Osmanovic bei der 0:3 Néierlag vu sengem Veräin Sered géint Slovan Bartislava op der Bänk. Sered huet no dëser Néierlag keng Chance méi, sech an der Tabell ze verbesseren oder verschlechteren a bleift op der 5. Plaz stoen.

Freideg

E Freideg den Owend war mam Danel Sinani ee Lëtzebuerger Futtballnationalspiller mat sengem Veräin am Ausland am Asaz. Huddersfield mam Sinani war am Playoff vun der Championship gefuerdert. Am Allersmatch vun den Halleffinallen ass et auswäerts géint Luton gaangen.

An hei huet de Lëtzebuerger Daniel Sinani direkt an der 12. Minutt fir säi Veräin getraff, an sou den 1:0 markéiert, nodeems hien am Strofraum ganz eleng stoung, wéi hien eng genee Pass zougespillt krut. Dëst sollt awer den eenzege Gol fir Huddersfield bleiwen. An der 30. Minutt huet den Sonny Bradley den 1:1-Ausgläich realiséiert. Bei dësem Score sollt et dann och bis zum Schluss bleiwen.